មកដឹងចន្លោះពេលដែលជនដៃដល់បាញ់គ្រាប់ទី ២ សម្លាប់លោក Abe

ប៉ូលិសជប៉ុនបាន​និយាយ​ថា ចន្លោះពេលនៃការបាញ់ចេញគ្រាប់ទី ២ បន្ទាប់ពីគ្រាប់ទី ១ របស់ជនដៃដល់លើការវាយប្រហារអតីតនាយករដ្ឋមន្ត្រីជប៉ុនលោក Abe Shinzo គឺជិត ៣ វិនាទី ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទន្ទឹមនោះ អាជ្ញាធរអនុវត្តច្បាប់របស់ប្រទេសជប៉ុនបាននិយាយថា មន្ត្រីប៉ូលិសដែលយាមកាមលោក Abe ​​បានបរាជ័យក្នុងការអនុវត្តតាមពិធីសារដើម្បីការពារឥស្សរជនជាន់ខ្ពស់ពីការវាយប្រហារដោយកាំភ្លើងក្នុងស្ថានភាពបែបនេះ ។

អាជ្ញាធរបានប្រាប់ទូរទស្សន៍ NHK ថា មន្ត្រីគួរតែរុញលោក Abe ឲ្យក្រាបដល់ដី និងចូលមកនៅជុំវិញដើម្បីការពារលោក បន្ទាប់ពីការបាញ់ចេញគ្រាប់ទី ១ ហើយបន្ទាប់មកនាំលោកទៅកាន់យានជំនិះ ឬកន្លែងសុវត្ថិភាពផ្សេងទៀត ។

អាជ្ញាធរបានបញ្ជាក់ទៀតថា ជនដៃដល់ឈ្មោះ Yamagami Tetsuya អាយុ ៤១ ឆ្នាំបានដើរចូលទៅជិតអតីតនាយករដ្ឋមន្ត្រីពីខាងក្រោយ ហើយបានបើកការបាញ់ប្រហារ ២ គ្រាប់មកលើលោក Abe នៅចម្ងាយជាច្រើនម៉ែត្រ ។

គួរបញ្ជាក់ថា លោក Abe ត្រូវខ្មាន់កាំភ្លើងបាញ់សម្លាប់ពីខាងក្រោយកាលពីថ្ងៃសុក្រ ខណៈដែលលោកកំពុងធ្វើសុន្ទរកថាយុទ្ធនាការឃោសនាបោះឆ្នោតលើដងផ្លូវនៅទីក្រុង Nara ភាគខាងលិចប្រទេសជប៉ុន ហើយភ្លាមៗនោះប៉ូលិសក៏បានចាប់ខ្លួនជនដៃដល់ឈ្មោះ Yamagami ដែលជាអ្នករស់នៅទីក្រុង Nara នោះតែម្ដង ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ចម្លើយសារភាពថ្មី ៖ ខ្មាន់កាំភ្លើងធ្លាប់បរាជ័យផែនការសម្លាប់លោក Abe ម្ដងហើយ