រុស្ស៊ី ថា នឹងសម្រេចគោលដៅជាមុនសិន ទើបកំណត់លក្ខខណ្ឌសម្រាប់កិច្ចព្រមព្រៀងសន្តិភាព តាមក្រោយ

អតីតប្រធានាធិបតីរុស្ស៊ី លោក Dmitry Medvedev ដែលជាសម្ព័ន្ធមិត្តលោក ពូទីន​ បាននិយាយថា ទីក្រុងមូស្គូ នឹងឈ្នះនៅអ៊ុយក្រែន ហើយនឹងកំណត់លក្ខខណ្ឌសម្រាប់កិច្ចព្រមព្រៀងសន្តិភាពនាពេលអនាគតជាមួយទីក្រុងកៀវ។

លោក Medvedev ដែលបច្ចុប្បន្នជាអនុប្រធានក្រុមប្រឹក្សាសន្តិសុខរុស្ស៊ី បាននិយាយនៅក្នុងសារបង្ហោះលើ Telegram ថា “រុស្ស៊ីនឹងសម្រេចបាននូវគោលដៅទាំងអស់ជាមុនសិន។ នឹងមានសន្តិភាព តាមលក្ខខណ្ឌរបស់យើងតាមក្រោយ”។

ការបង្ហោះរបស់លោក Medvedev បានកើតឡើងបន្ទាប់ពីរដ្ឋមន្ត្រីការបរទេសអ៊ុយក្រែនប្រកាសថា ការចរចាសន្តិភាពជាមួយទីក្រុងមូស្គូ អាចកើតឡើងបាន លុះត្រាតែរុស្ស៊ីបរាជ័យក្នុងសមរភូមិប៉ុណ្ណោះ។

នៅក្នុងបទសម្ភាសន៍ជាមួយទស្សនាវដ្តី Forbes អ៊ុយក្រែន ដែលចេញផ្សាយកាលពីថ្ងៃចន្ទទី១៨ខែកក្កដា លោក Dmitry Kuleba បានចាត់ទុក “អាកប្បកិរិយាបង្កហេតុអាក្រក់” របស់រុស្ស៊ី ថាជាហេតុផលសម្រាប់អវត្តមាននៃកិច្ចចរចាសន្តិភាព។

លោក Kuleba ពន្យល់ថា “ខ្ញុំប្រាប់ដៃគូទាំងអស់នូវរឿងសាមញ្ញមួយ។ នោះគឺថា រុស្ស៊ីនឹងអង្គុយនៅតុចរចា បន្ទាប់ពីចាញ់នៅសមរភូមិ។ បើ​មិន​ដូច្នេះ​ទេ វា​នឹង​ក្លាយ​ជា​ភាសា​នៃ​ឱសានវាទ​ម្ដង​ទៀត”៕

ប្រែសម្រួល៖ Vann Vann

ប្រភព៖ Al Jazeera

ចុចអាន៖ អ៊ុយក្រែន ប្រាប់លក្ខខណ្ឌ ដែលអាចឲ្យ ការចរចាសន្តិភាពជាមួយរុស្ស៊ី កើតឡើងបាន