ឡាវ រកឃើញរថយន្តជាង ៣ ម៉ឺនគ្រឿងនាំចូលប្រទេសដោយមិនបង់ពន្ធ

ឡាវរកឃើញរថយន្តជាង ៣០,០០០ គ្រឿងរត់ពន្ធចូលប្រទេសដោយមិនបានបង់ពន្ធចូលរដ្ឋ ប៉ុន្តែក្នុងនោះក៏មានរថយន្តចំនួន ២០,៧៧៣ គ្រឿងបានបង់ពន្ធត្រឹមត្រូវរួចហើយផងដែរក្នុងរយៈពេល ៦ ខែដំបូងនៃឆ្នាំ ២០២២នេះ ។

លោក សនសៃ ស៊ីផាន់ដន ឧបនាយករដ្ឋមន្ត្រីឡាវបានទទួលស្គាល់ថា ពិតជាមានការរត់ពន្ធរថយន្តចូលប្រទេសឡាវដោយខុសច្បាប់ និងមិនបានបង់ពន្ធចូលរដ្ឋចំនួន ៣០,៤៧១ គ្រឿង ក្នុងនោះរដ្ឋាភិបាលបានចេញបញ្ជាឲ្យអ្នកនាំចូលរថយន្តទាំងនោះ ត្រូវចូលបង់ពន្ធផ្សេងៗជូនរដ្ឋបានចំនួន ២០,៧៧៣ គ្រឿងរួចហើយក្នុងរយៈពេល ៦ ខែដំបូងនៃឆ្នាំ ២០២២ នេះ ហើយនឹងបន្តការត្រួតពិនិត្យថែមទៀតចំពោះរថយន្តគេចពន្ធដែលនៅសល់ចំនួន ៩,៦៩៨ គ្រឿងនៅចុងឆ្នាំ ២០២២ នេះ ដើម្បីបង្កើនប្រាក់ចំណូលរបស់រដ្ឋ ។

ប្រភពដដែលបន្តថា លោក ខាំផាន់ វិផាវ៉ាន់ នាយក​រដ្ឋមន្ត្រីឡាវក៏បាន​ទទួល​ស្គាល់ដែរ​ថា ​ឡាវពិតជាមាន​អំពើពុករលួយមែន ខណៈកន្លងមកគឺ​ការ​នាំ​ចូលប្រេងឥន្ទនៈ ។ យោងតាមទន្និន័យពីក្រសួងពាណិជ្ជកម្ម និងឧស្សាហកម្មបានរាយការណ៍ទៅរដ្ឋាភិបាលថា ឡាវបាននាំចូលប្រេងឥន្ទនៈពីប្រទេសថៃ និងវៀតណាមសរុបប្រមាណ ១,២០០ លានលីត្រក្នុងរយៈពេល ១ ឆ្នាំកន្លងមកនេះ ។

ប៉ុន្តែបន្ទាប់ពីការត្រួតពិនិត្យព័ត៌មានផ្ទាល់ជាមួយ​ប្រទេសនាំចូល ​ដូច​ជា ថៃ និង​វៀតណាម ទើប​ដឹង​ថា ប្រទេសឡាវបាន​នាំ​ចូល​ប្រេងពីប្រទេសថៃ និងវៀតណាម ក្នុងបរិមាណសរុបគឺ ១,៩០០ លានលីត្រឯណោះ ដែលមានន័យថា ឡាវមានអំពើពុករលួយក្នុងការនាំចូលប្រេងឥន្ទនៈសរុបដល់ទៅ ៧០០ លានលីត្រក្នុងមួយឆ្នាំ ដោយមានការឃុបឃិតគ្នារវាងមន្ត្រីពន្ធជាមួយនឹងក្រុមហ៊ុនដែលនាំចូលប្រេងឥន្ទនៈទាំងនោះ ៕

ប្រែសម្រួលដោយ ៖ គង់ សំអាន

ប្រភព ៖ VOA Lao

ចុចអាន ៖ លោក Boris Johnson ចុះបង្រៀនបាញ់មីស៊ីល និងគប់គ្រាប់បែកដល់ទ័ព អ៊ុយក្រែន