ព្រឹទ្ធសភាអាមេរិក បោះឆ្នោតផ្តល់សច្ចាប័នលើសមាជិកភាពណាតូ របស់ ហ្វាំងឡង់ និងស៊ុយអែត

ព្រឹទ្ធសភាអាមេរិក បានអនុម័តសេចក្តីសម្រេចមួយ កាលពីថ្ងៃពុធទី០៣ខែសីហា ដែលផ្តល់សច្ចាប័នលើសំណើរបស់ប្រទេសហ្វាំងឡង់ និងស៊ុយអែត ដើម្បីចូលរួមជាមួយអង្គការណាតូ ខណៈសម្ព័ន្ធមិត្តយោធាលោកខាងលិច ព្យាយាមពង្រឹងកម្លាំងរបស់ខ្លួន ប្រឆាំងនឹងការគំរាមកំហែងដែលបង្កឡើងដោយរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីសម្រេចនេះ ត្រូវបានអនុម័តនៅក្នុងការបោះឆ្នោត ៩៥ ទល់នឹង ១ ដោយលោក Josh Hawley គឺជាសមាជិកព្រឹទ្ធសភាតែម្នាក់គត់ ដែលបានបោះឆ្នោតប្រឆាំងនឹងការផ្តល់សច្ចាប័ន។

មេដឹកនាំសំឡេងភាគច្រើនលោក Chuck Schumer បាននិយាយក្នុងព្រឹទ្ធសភា ភ្លាមៗមុនពេលបោះឆ្នោតថា “ការបោះឆ្នោតថ្ងៃនេះបង្ហាញថា សម្ព័ន្ធភាពរបស់យើងកាន់តែរឹងមាំជាងពេលណាទាំងអស់។ នេះមានសារសំខាន់បំផុត និងជាសញ្ញាមួយដល់រុស្ស៊ីថា ពួកគេមិនអាចបំភិតបំភ័យអាមេរិក ឬអឺរ៉ុបបានទេ”។

ឥឡូវនេះ រដ្ឋបាលរបស់លោក Joe Biden ត្រូវបានគេរំពឹងថា នឹងបញ្ជូនឯកសារផ្តល់សច្ចាប័ននេះទៅអង្គការណាតូ។

គួរបញ្ជាក់ថា ប្រទេសទាំង ៣០ នៃអង្គការណាតូ ត្រូវតែផ្តល់សច្ចាប័នលើពាក្យស្នើសុំ មុនពេលហ្វាំងឡង់ និងស៊ុយអែតអាចក្លាយជាសមាជិកបាន។

ប្រទេសអ៊ឺរ៉ុបទាំងពីរ កំពុងស្វែងរកការចូលជាសម្ព័ន្ធមិត្ត ដែលនឹងបញ្ចប់អព្យាក្រឹតភាពយោធាយូរអង្វែងរបស់ពួកគេ ជាការឆ្លើយតបទៅនឹងសកម្មភាពលុកលុយ របស់រុស្ស៊ីលើអ៊ុយក្រែន។

ប្រទេសចុងក្រោយដែលចូលរួមជាមួយអង្គការណាតូ គឺ ម៉ាសេដូនីខាងជើង ក្នុងឆ្នាំ ២០២០៕

ប្រែសម្រួល៖ Vann Vann

ប្រភព៖ NBC News

ចុចអាន៖ ប៉ូឡូញ ចង់បង្កើត កងទ័ព ណាតូ ខ្លាំង បំផុត នៅ អឺរ៉ុប