រុស្ស៊ីព្រមានថា អាមេរិក អាចប្រើវិបត្តិនៅអ៊ុយក្រែន ជាលេសដើម្បីដាក់ពង្រាយអាវុធនុយក្លេអ៊ែរ ចូលក្នុងលំហអាកាស

លោក Andrei Belousov តំណាងរបស់រុស្ស៊ីប្រចាំអង្គការសហប្រជាជាតិ បាននិយាយថា សហរដ្ឋអាមេរិកអាចប្រើប្រាស់វិបត្តិសន្តិសុខនៅអ៊ុយក្រែន ធ្វើជាលេសដើម្បីដាក់ពង្រាយអាវុធ រួមទាំងអាវុធនុយក្លេអ៊ែរផងដែរ ចូលទៅក្នុងលំហអាកាស។

ថ្លែងទៅកាន់អ្នកសារព័ត៌មាននៅខាងក្រៅសន្និសីទត្រួតពិនិត្យលើកទី១០ នៃភាគីសន្ធិសញ្ញាស្តីពីការមិនរីកសាយភាយអាវុធនុយក្លេអ៊ែរ កាលពីថ្ងៃសុក្រទី០៥ខែសីហា អ្នកការទូតរូបនេះបាននិយាយថា “វាមិនអាចទៅរួចទេ ក្នុងការភ្ជាប់ដោយផ្ទាល់ នូវហានិភ័យនៃការដាក់ពង្រាយអាវុធចូលក្នុងលំហទៅនឹងប្រតិបត្តិការយោធាពិសេសរបស់រុស្ស៊ីនៅលើទឹកដីនៃប្រទេសអ៊ុយក្រែន។ មិនមានទំនាក់ទំនងបែបនេះឡើយ”។

លោកបន្តថា “ទោះបីជាយ៉ាងណាក៏ដោយ ការពិតនៅតែថា សហរដ្ឋអាមេរិក និងសម្ព័ន្ធមិត្តនឹងប្រើប្រាស់សន្លឹកបៀរបស់អ៊ុយក្រែនជាអំណះអំណាងបន្ថែម ក្នុងការអនុវត្ដផែនការយោធារបស់ពួកគេ មិនត្រឹមតែនៅលើដី សមុទ្រ និងនៅលើអាកាសប៉ុណ្ណោះទេ ប៉ុន្តែក៏នៅក្នុងលំហអាកាសផងដែរ។ ដូច្នេះ មិនអាចច្រានចោលបានទេថា ប្រតិបត្តិការយោធាពិសេស នឹងត្រូវបានប្រើជាលេស សម្រាប់ការអនុវត្តជាក់ស្តែងកាន់តែលឿននៃផែនការទាំងនេះ”។

លើសពីនេះ លោក Belousov បានលើកឡើងថា ការបដិសេធរបស់ទីក្រុងវ៉ាស៊ីនតោន ក្នុងកិច្ចពិភាក្សាអំពីមធ្យោបាយស្របច្បាប់ ដើម្បីទប់ស្កាត់ការប្រកួតប្រជែងអាវុធនៅក្នុងលំហអាកាសនារយៈពេលមួយទសវត្សរ៍កន្លះកន្លងមកនេះ គឺជាការនិយាយដោយខ្លួនឯង៕

ប្រែសម្រួល៖ Vann Vann

ប្រភព៖ Sputnik

ចុចអាន៖ យុទ្ធសាស្ត្រប្រយុទ្ធរបស់អ៊ុយក្រែន កំពុងបង្កគ្រោះថ្នាក់ដល់ជនស៊ីវិល