គ្រោះរាំងស្ងួតកំពុងអុកឡុកប្រទេសមួយនៅ អឺរ៉ុប ឲ្យអស់ទឹកផឹក

រលកកម្ដៅបានវាយប្រហារម្ដងទៀតលើប្រទេសជាច្រើននៅអឺរ៉ុប ហើយវាក៏កំពុងធ្វើឲ្យទ្វីបមួយនេះជួបគ្រោះរាំងស្ងួតមិនធ្លាប់មានពីមុនក្នុងប្រវត្តិសាស្ត្រផងដែរ ជាពិសេសប្រទេសបារាំងកំពុងទទួលរងនូវការអស់ទឹកផឹក ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Christophe Bechu រដ្ឋមន្ត្រី​ក្រសួង​បរិស្ថានបារាំង​បាន​ថ្លែង​ថា សហគមន៍ជាង ១០០ កំពុងត្រូវការទឹកស្អាត ហើយអាជ្ញាធរក៏កំពុងដឹកទឹកទៅកាន់ទីនោះផងដែរក្នុងគោលបំណងដើម្បីសម្រាលបន្ទុកដល់ពួកគេ បន្ទាប់ពីមិនមានទឹកសូម្បីមួយតំណក់នៅក្នុងទុយោនោះទេ ។

គ្រោះរាំងស្ងួតកំពុងប៉ះពាល់ដល់តំបន់ភាគច្រើននៃប្រទេសបារាំងដីគោក ដោយមានភ្លៀងធ្លាក់ត្រឹមតែ ០.៩៦ សង់ទីម៉ែត្រប៉ុណ្ណោះក្នុងខែកក្កដា ដែលជាភាពរាំងស្ងួតអាក្រក់បំផុតក្នុងកំណត់ត្រាប្រទេស ចាប់តាំងពីខែមីនា ឆ្នាំ ១៩៦១ មក ។

ទន្ទឹមនោះរោងចក្រថាមពលនុយក្លេអ៊ែរមួយចំនួនត្រូវកាត់បន្ថយទិន្នផលផលិតរបស់ពួកគេផងដែរ ដោយសារតែទឹកទន្លេនៅជុំវិញនោះក្តៅពេក ពិបាកក្នុងការធ្វើឲ្យរ៉េអាក់ទ័រចុះត្រជាក់ ។ ចំណែកគុម្ពោត និងដើមឈើជ្រុះស្លឹកជាបន្តបន្ទាប់ដែលធ្វើឲ្យទេសភាពមើលទៅដូចជារដូវស្លឹកឈើជ្រុះមិនមែនជារដូវក្ដៅនោះទេ ខណៈប្រព័ន្ធធារាសាស្រ្តក៏ត្រូវបានហាមឃាត់ផងដែរនៅក្នុងប្រទេសភាគច្រើន ។

ស្របពេលជាមួយគ្នានេះ ផលប៉ះពាល់ពីគ្រោះរាំងស្ងួតនេះក៏កំពុងវាយប្រហារដល់ស្ថានភាពស្បៀងអាហារនៅអឺរ៉ុបសាជាថ្មីផងដែរ ខណៈមនុស្សជាច្រើនបារម្ភថា គ្រោះរាំងស្ងួតនឹងកាត់បន្ថយទិន្នផលដំណាំនៅឆ្នាំនេះ បន្ទាប់ពីការនាំចូលពីអ៊ុយក្រែន និងរុស្ស៊ីកំពុងធ្លាក់ចុះ ឯតម្លៃក៏ឡើងខ្ពស់ទៀត ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik