អតីតប្រធានាធិបតី ស្រីលង្កា ដែលបណ្ដេញចេញពីតំណែង ត្រៀមមកជ្រកកោនប្រទេសអាស៊ានទី ២

ប្រធានាធិបតីដែលត្រូវបានបណ្តេញចេញរបស់ប្រទេសស្រីលង្កាលោក Gotabaya Rajapaksa រំពឹងថានឹងមកដល់ប្រទេសថៃនៅថ្ងៃព្រហស្បតិ៍នេះ ដើម្បីស្វែងរកជម្រកបណ្តោះអាសន្ននៅក្នុងប្រទេសអាស៊ីអាគ្នេយ៍ទី ២ បន្ទាប់ពីបានភៀសខ្លួនចេញពីប្រទេសកោះរបស់លោកកាលពីខែមុន ចំពេលមានការតវ៉ាដ៏ធំ ។

លោក Rajapaksa បានភៀសខ្លួនទៅកាន់ប្រទេសសិង្ហបុរីកាលពីថ្ងៃទី ១៤ ខែកក្កដា តាមរយៈប្រទេសម៉ាល់ឌីវ បន្ទាប់ពីភាពចលាចលមិនធ្លាប់មានពីមុនមកដែលបង្កឡើងដោយវិបត្តិសេដ្ឋកិច្ចដ៏អាក្រក់បំផុតរបស់ប្រទេសស្រីលង្កាក្នុងរយៈពេល ៧ ទសវត្សរ៍ និងបន្ទាប់ពីបាតុកររាប់ពាន់នាក់បានសម្រុកចូលលំនៅដ្ឋាន និងការិយាល័យរបស់ប្រធានាធិបតី ។

បន្ទាប់មក មន្ត្រីយោធាចូលនិវត្តន៍រូបនេះបានលាលែងពីតំណែង ហើយបានក្លាយជាប្រធានាធិបតីស្រីលង្កាដំបូងគេ ដែលលាលែងពីតំណែងនៅពាក់កណ្តាលអាណត្តិ ខណៈពេលនេះលោកនាយករដ្ឋមន្ត្រី Ranil Wickeremesinghe បានឡើងកាន់តំណែងជំនួសលោក Rajapaksa ។

លោក Rajapaksa មិនបានបង្ហាញខ្លួនជាសាធារណៈ ឬការអត្ថាធិប្បាយណាមួយឡើយ ចាប់តាំងពីចាកចេញពីប្រទេសស្រីលង្កា ហើយរដ្ឋាភិបាលសិង្ហបុរីបាននិយាយនៅខែនេះថា មិនបានផ្តល់ឯកសិទ្ធិ ឬអភ័យឯកសិទ្ធិណាមួយដល់អតីតប្រធានាធិបតីរូបនេះឡើយ ៕

ប្រែសម្រួលដោយ ៖ ជីវ័ន្ត

ប្រភព ៖ Reuters

ចុចអាន ៖ ក្រោយបញ្ចប់ដំណើរទស្សនកិច្ចនៅ តៃវ៉ាន់ លោកស្រី Pelosi សរសើរ ចិន ពេញៗមាត់