លោក មីន អ៊ុងឡាំង ទៅ រុស្ស៊ី ម្ដងទៀត តែមិនមែនផ្ដោតលើកិច្ចពិភាក្សា​យោធាទេ

មេដឹកនាំយោធាមីយ៉ាន់ម៉ាលោក មីន អ៊ុងឡាំង នឹងធ្វើដំណើរទៅកាន់ប្រទេសរុស្ស៊ីម្តងទៀត ចាប់ពីថ្ងៃទី ៥ ដល់ថ្ងៃទី ៨ ខែកញ្ញា ដើម្បីចូលរួមកិច្ចប្រជុំសេដ្ឋកិច្ចបូព៌ា ​( Eastern Economic Forum) លើកទី ៧ នៅទីក្រុង Vladivostok ។

សារព័ត៌មាន Popular News Journal បានរាយការណ៍ថា លោក មីន អ៊ុងឡាំង នឹង​ធ្វើ​ដំណើរ​ទៅកាន់​សហព័ន្ធ​រុស្ស៊ីម្តងទៀត​នៅ​ថ្ងៃ​ច័ន្ទទី​៥ ខែ​កញ្ញា ដើម្បីចូលរួមកិច្ចប្រជុំសេដ្ឋកិច្ចបូព៌ាលើកទី៧ (The 7th Eastern Economic Forum 2022) នៅទីក្រុង Vladivostok ហើយមេដឹកនាំយោធារូបនេះនឹងបន្តស្នាក់នៅក្នុងប្រទេសរុស្ស៊ីរហូតដល់ថ្ងៃព្រហស្បតិ៍ ទី៨ ខែកញ្ញា ឆ្នាំ ២០២២ ។

នេះមិនមែនជាលើកទីមួយទេសម្រាប់លោក មីន អ៊ុងឡាំង ដែលធ្វើដំណើរទៅកាន់ប្រទេសរុស្ស៊ី ពោលកាលពីថ្ងៃទី១២ ខែកក្កដា ឆ្នាំ២០២២ កន្លងទៅ មេដឹកនាំយោធារូបនេះបានទៅទីក្រុងមូស្គូម្ដងរួចមកហើយដើម្បីពិភាក្សាពីកិច្ចសហប្រតិបត្តិការយោធា រវាងកងទ័ពរុស្ស៊ី និងកងទ័ពមីយ៉ាន់ម៉ា ។

ទន្ទឹមនោះ បន្ទាប់ពី លោក មីន អ៊ុងឡាំង បានវិលត្រឡប់មកពីប្រទេសរុស្ស៊ីវិញមិនដល់មួយខែផង ពោលគឺនៅថ្ងៃទី៣ ខែសីហា ឆ្នាំ២០២២ រដ្ឋមន្ត្រីការបរទេសរុស្ស៊ី លោក Sergei Lavrov ក៏បានធ្វើដំណើរទស្សនកិច្ចមកកាន់ប្រទេសមីយ៉ាន់ម៉ា និង​បាន​ជួបពិភាក្សា​ជាមួយ ​លោក មីន អ៊ុងឡាំង ផងដែរនៅ​ទីក្រុងណៃពិដោរ ។

គួរបញ្ជាក់ថា ការបំពេញ​ទស្សនកិច្ចទៅកាន់​​រុស្ស៊ីលើកនេះរបស់លោក មីន អ៊ុងឡាំង កើតឡើង ចំ​ពេលមាន​វិបត្តិ​ហិរញ្ញវត្ថុជា​ថ្មី​​ក្នុង​ប្រទេស​មីយ៉ាន់ម៉ា ពោលគឺ​រូបិយប័ណ្ណគីយ៉ាត់ (Kyat) ធ្លាក់ថ្លៃ​ខ្លាំងជា​បន្តបន្ទាប់​ជាង​មួយ​សប្តាហ៍កន្លងមកនេះ ៕

ប្រែសម្រួលដោយ ៖ គង់ សំអាន

ប្រភព ៖ MGR Online

ចុចអាន ៖ អាមេរិក ថ្កោលទោសយោធា មីយ៉ាន់ម៉ា ចំពោះការកាត់ទោសលោកស្រី អ៊ុងសាន ស៊ូជី ឲ្យជាប់ពន្ធនាគារ ៣ ឆ្នាំទៀត