ប៉ូលិសកាណាដា ចាប់បានជនសង្ស័យក្នុងការចាក់ប្រហារ ដែលសម្លាប់មនុស្ស ១០នាក់

ប៉ូលិស​កាណាដា ​បាន​ចាប់​ខ្លួន​ជន​សង្ស័យ​ក្នុងហេតុ​ការណ៍ចាក់​ប្រហារ​ដ៏រង្គាល ​ដែល​បណ្តាល​ឲ្យ​មនុស្ស ១០ នាក់​ស្លាប់ និង ១៨ នាក់​ផ្សេង​ទៀត​រង​របួស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចាប់ខ្លួនលោក Myles Sanderson បានបញ្ចប់ការតាមប្រមាញ់ ដែលលាតសន្ធឹងលើខេត្តចំនួនបី ហើយបានជំរុញឲ្យមានសំណួរអំពីមូលហេតុដែលគាត់ត្រូវបានដោះលែងពីពន្ធនាគារ ទោះបីជាមានប្រវត្តិប្រើអំពើហិង្សាក៏ដោយ។

ប៉ូលិសនិយាយថា គាត់ត្រូវបានចាប់ខ្លួននៅក្នុងទីក្រុង Rosthern នៃខេត្ត Saskatchewan នៅម៉ោងប្រហែល ១៥:៣០ (ម៉ោងក្នុងស្រុក)។

ជនរងគ្រោះចំនួន១០នាក់ កំពុងសម្រាកព្យាបាលនៅមន្ទីរពេទ្យ ដោយក្នុងនោះមាន៣នាក់ស្ថិតក្នុងស្ថានភាពធ្ងន់ធ្ងរ។

ដំណឹងនៃការចាប់ខ្លួនជនសង្ស័យ បានកើតឡើងភ្លាមៗ បន្ទាប់ពីកាណាដា ផ្ញើសេចក្តីជូនដំណឹងដល់អ្នកប្រើប្រាស់ទូរស័ព្ទ កាលពីរសៀលថ្ងៃពុធ ដោយព្រមានប្រជាជននៅជិតក្រុង Wakaw ឲ្យរកកន្លែងលាក់ខ្លួនជាបន្ទាន់ ដោយសារតែបុរសម្នាក់ ដែលប្រដាប់ដោយកាំបិតត្រូវបានគេឃើញបើកបរនៅក្នុងតំបន់។

បងប្រុសរបស់ជនសង្ស័យគឺលោក Damien Sanderson ក៏ត្រូវបានចោទប្រកាន់ពីបទដើរតួនាទីក្នុងការវាយប្រហារកាលពីថ្ងៃអាទិត្យនៅតំបន់ដាច់ស្រយាលផងដែរ។

កាល​ពី​ថ្ងៃ​ចន្ទ ប៉ូលិស​បាន​រក​ឃើញ​សាក​សព​របស់​គាត់ ហើយ​ឥឡូវ​កំពុង​ស៊ើប​អង្កេត​ថា តើ​ប្អូន​ប្រុស​របស់​គាត់​បាន​សម្លាប់​គាត់​អំឡុង​ពេល​តាម​ប្រមាញ់មែន​ឬក៏​អត់៕

ប្រែសម្រួល៖ Vann Vann

ប្រភព៖ BBC

ចុចអាន៖ ជនសង្ស័យម្នាក់ ក្នុងការចាក់ប្រហារនៅ កាណាដា ត្រូវគេប្រទះឃើញស្លាប់