ឈៀងម៉ៃ ជួបគ្រោះរញ្ជួយដី ខណៈខេត្តភាគច្រើន ថៃ កំពុងមានទឹកជំនន់

យោងតាមនាយកដ្ឋានឧតុនិយមថៃបានឲ្យដឹងនៅព្រឹកថ្ងៃពុធនេះថា គ្រោះរញ្ជួយដីកម្រិត ៣.៦ រ៉ិចទ័របានវាយប្រហារស្រុក Fang ក្នុងខេត្តឈៀងម៉ៃ ភាគខាងជើងប្រទេសថៃ នៅវេលាម៉ោង ១ និង ០៣ នាទីរំលងអធ្រាត្រ ប៉ុន្តែមិន​មានសេចក្ដី​រាយការណ៍​ពី​ការ​រង​របួស ការ​ស្លាប់ ឬ​ការ​ខូច​ខាតធ្ងន់ធ្ងរណាមួយ​ឡើយ ។

ចំណុចកណ្តាលនៃការរញ្ជួយដីនេះគឺនៅក្នុងឃុំ Mae Kha មានជម្រៅត្រឹម ៤ គីឡូម៉ែត្រប៉ុណ្ណោះ ប៉ុន្តែក៏បណ្តាលឲ្យប្រជាជនក្នុងតំបន់មានអារម្មណ៍ភ័យស្លន់ស្លោរផងដែរ ស្របពេលដែលទឹកជំនន់ក៏កំពុងវាយលុកខេត្តភាគច្រើនក្នុងប្រទេសថៃផងដែរ ។

ការរញ្ជួយខ្លាំងត្រូវបានគេរាយការណ៍ថានៅក្នុងឃុំ Mae Kha, Chai Prakan និង Mae Ngon ហើយការរញ្ជួយនេះមានចម្ងាយ ១០០ គីឡូម៉ែត្រភាគខាងត្បូងក្នុងទីក្រុង Muang Chiang Mai ។

ភាគខាងជើងប្រទេសថៃតែងកើតឡើងការរញ្ជួយដីជាញឹកញាប់ ដោយសារតែមានទីតាំងស្ថិតនៅលើខ្សែបន្ទាត់ស្នាមប្រេះជាច្រើន ។ បើទោះជាយ៉ាងនេះក្ដី ការរញ្ជួយដីនៅក្នុងតំបន់គឺមានទំហំតូច ហើយបង្កើតឲ្យមានការខូចខាតតិចតួចប៉ុណ្ណោះ ។

គួរបញ្ជាក់ថា ការរញ្ជួយដីខ្លាំងបំផុតដែលបានវាយប្រហារភាគខាងជើងប្រទេសថៃគឺកើតឡើងកាលពីខែឧសភា ឆ្នាំ ២០១៤ ពោលគ្រោះរញ្ជួយដីនោះមានកម្រិត ៦.៣ រ៉ិចទ័បានវាយប្រហារក្នុងស្រុក Mae Lao ក្នុងខេត្តឈៀងម៉ៃ ដោយបានសម្លាប់មនុស្សម្នាក់ និងរបួសជាង ១០០ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ Thaiger

ចុចអាន ៖ ថៃ ប្រកាសបើកទំនប់ និងព្រមានហានិភ័យគ្រោះទឹកជំនន់ចំពោះខេត្តចំនួន៥ រួមទាំងទីក្រុង បាងកក