ថៃ ប្រាប់ប្រជាពលរដ្ឋ ឲ្យត្រៀមខ្លួនជម្លៀស ខណៈស្ថានភាពនៅទំនប់ទឹកចំនួន១៣ កាន់តែមិនស្រួល (មានវីដេអូ)

ការិយាល័យធនធានទឹកជាតិថៃ (ONWR) បានចេញការព្រមានកាលពីថ្ងៃព្រហស្បតិ៍ទី១៥ខែកញ្ញា ដោយលើកឡើងពីការព្យាករណ៍របស់នាយកដ្ឋានឧតុនិយម ដែលនិយាយថា តំបន់ភាគច្រើននៃប្រទេសថៃ នឹងមានភ្លៀងធ្លាក់កាន់តែខ្លាំង រហូតដល់ថ្ងៃអាទិត្យ។

ONWR បានព្រមានថា ចាប់ពីថ្ងៃទី១៧ដល់ថ្ងៃទី២១ខែកញ្ញា តំបន់ខាងក្រោម គឺងាយនឹងកើតមានជំនន់ទឹកភ្លៀង និងទឹកទន្លេហូរហៀរ ហើយស្នើឲ្យប្រជាពលរដ្ឋដែលរស់នៅក្បែរមាត់ទន្លេ និងអាងស្តុកទឹក ត្រូវតាមដានព័ត៌មានថ្មីៗអំពីអាកាសធាតុ និងកម្រិតទឹក ព្រមទាំងត្រៀមខ្លួនជម្លៀសបើមានរឿងអ្វីកើតឡើង។

ONWR ក៏បានជំរុញផងដែរ ឲ្យអាជ្ញាធរតាមដានយ៉ាងដិតដល់នូវកម្រិតទឹកនៃទំនប់ចំនួន ១៣ និងអាងស្តុកទឹកធំៗ ដែលនឹងត្រូវរងផលប៉ះពាល់ដោយភ្លៀងធ្លាក់ខ្លាំង និងចេញការព្រមានដល់សហគមន៍ជុំវិញនៅពេលទឹកឡើងដល់កម្រិតធ្ងន់ធ្ងរ។

ទំនប់ទឹកទាំងនោះមានដូចជា៖

– Mae Ngat Somboon Chon នៅ Chiang Mai

– Kiew Kho Ma, Kiew Lom និង Mae Mok នៅ Lampang

– Thab Salao នៅ Uthai Thani

– Krasiao នៅ Suphan Buri

– Ubol Ratana នៅ Khon Kaen

– Lam Takhong, Lam Phra Phloeng និង Mun Bon នៅ Nakhon Ratchasima

– Klong Si Yat នៅ Chachoengsao

– Bang Phra នៅ Chonburi

– Nong Pla Lai នៅ Rayong

ការិយាល័យ បានស្នើឲ្យអាជ្ញាធរមូលដ្ឋាន រៀបចំផែនការជម្លៀសប្រជាជនដែលរស់នៅក្បែរទន្លេ និងតំបន់ងាយរងគ្រោះដោយទឹកជំនន់ និងចេញការព្រមានជាមុន ដើម្បីទុកពេលគ្រប់គ្រាន់សម្រាប់ប្រជាជនក្នុងការគេចផុតពីទឹកជំនន់៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Nation

ចុចអាន៖ បាងកក នឹងប្រកាសទីតាំងលិចលង់ដោយទឹកជំនន់ជាតំបន់គ្រោះមហន្តរាយ