អ៊ុយក្រែន​ រំដោះបានភូមិសំខាន់ៗ ក្នុងតំបន់ ដែលរុស្ស៊ី ទើបកាត់យក (មានវីដេអូ)

កងកម្លាំងអ៊ុយក្រែនបានរំដោះភូមិសំខាន់មួយក្នុងតំបន់ Kherson ភាគខាងត្បូង ដែលរុស្ស៊ី ទើបកាត់យក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងការពារជាតិក្នុងទីក្រុង កៀវ បានបង្ហោះវីដេអូមួយ ដែលបង្ហាញពីកងពលតូចម៉ារីនទី ៣៥ កំពុងបង្ហូតទង់ជាតិអ៊ុយក្រែននៅភូមិ Davydiv Brid ចំពេលមានសេចក្តីរាយការណ៍ថា ភូមិជាច្រើនផ្សេងទៀតនៅក្បែរនោះ ក៏ត្រូវបានដណ្តើមយកផងដែរ។

កម្លាំង​រុស្ស៊ី​ ត្រូវ​បង្ខំឲ្យ​ដក​ថយ​រួចទៅ​ហើយ​នៅ​ភាគ​ឦសានប្រទេស ​អ៊ុយក្រែន ហើយឥឡូវ ពួកគេក៏ត្រូវបានបង្ខំឲ្យដកថយផងដែរ នៅភាគខាងត្បូង។

បរាជ័យចុងក្រោយបំផុតរបស់កងទ័ពរុស្ស៊ី បានកើតឡើងខណៈលោកប្រធានាធិបតី វ្ល៉ាឌីមៀរ ពូទីន ត្រៀមចុះហត្ថលេខាជាធរមាន នូវក្រឹត្យដែលដាក់បញ្ចូលតំបន់អ៊ុយក្រែនចំនួន៤ជាឧបសម្ព័ន្ធ ទោះសង្គ្រាមកំពុងផ្ទុះខ្លាំងនៅក្នុងតំបន់ទាំង៤នោះក៏ដោយ។

ឧបសម្ព័ន្ធនេះមិនមានភាពស្របច្បាប់នៅក្រោមច្បាប់អន្តរជាតិទេ ហើយប្រធានាធិបតីអ៊ុយក្រែនលោក Volodymyr Zelensky បានប្រកាសថា ពួកគេទុកជាមោឃៈ។

លោក Zelensky បាននិយាយថា កងកម្លាំងអ៊ុយក្រែនបានធ្វើប្រតិបត្តិការដ៏ខ្លាំងក្លា និងរហ័សនៅភាគខាងត្បូងប្រទេស ហើយបានរំដោះតំបន់ជាច្រើន ក្នុងរយៈពេលត្រឹមមួយសប្តាហ៍។

ដោយឡែក ប្រធានាធិបតីអាមេរិកលោក Joe Biden បាននិយាយជាមួយលោក Zelensky កាលពីថ្ងៃអង្គារ ហើយបានធានាដល់ប្រធានាធិបតីអ៊ុយក្រែនថា សហរដ្ឋអាមេរិក នឹងមិនទទួលស្គាល់ការកាត់បញ្ចូលរបស់រុស្ស៊ីឡើយ។ មេដឹកនាំទាំង២ ក៏បានពិភាក្សាអំពីជំនួយរបស់សហរដ្ឋអាមេរិកក្នុងទំហំទឹកប្រាក់ ៦២៥លានដុល្លារ រួមទាំងប្រព័ន្ធបាញ់រ៉ុកកែត Himars ផងដែរ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ រុស្ស៊ី បង្ហាញចំនួនទាហាន ដែលខ្លួនកែនបាន ទៅប្រយុទ្ធនៅ អ៊ុយក្រែន