រុស្ស៊ី ព្រមាន កំណត់គោលដៅលើ ផ្កាយរណបពាណិជ្ជកម្មរបស់ លោកខាងលិច (មានវីដេអូ)

មន្ត្រីជាន់ខ្ពស់ម្នាក់នៅក្រសួងការបរទេសរុស្ស៊ី និយាយថា ផ្កាយរណបពាណិជ្ជកម្មពីសហរដ្ឋអាមេរិក និងសម្ព័ន្ធមិត្ត អាចក្លាយជាគោលដៅស្របច្បាប់សម្រាប់រុស្ស៊ី ប្រសិនបើពួកគេចូលរួមក្នុងសង្គ្រាមនៅអ៊ុយក្រែន។

ក្នុងឆ្នាំ១៩៥៧ ប្រទេសរុស្ស៊ី បានបាញ់បង្ហោះផ្កាយរណប Sputnik 1 ដែលជាផ្កាយរណបបង្កើតដោយមនុស្សដំបូងគេ ដែលបានទៅដល់ទីអវកាស ហើយនៅឆ្នាំ១៩៦១ រុស្ស៊ី បានបញ្ជូនមនុស្សលើកដំបូងនៅក្នុងលំហអាកាស។ រឿងទាំងនេះ បង្ហាញថា ទីក្រុងមូស្គូ ក៏មានសមត្ថភាពវាយប្រហារលើលំហអាកាស ដូចសហរដ្ឋអាមេរិក និងចិនដែរ។

ហើយនៅឆ្នាំ២០២១ រុស្ស៊ីបានបាញ់បង្ហោះកាំជ្រួចប្រឆាំងផ្កាយរណប ដើម្បីបំផ្លាញផ្កាយរណបមួយរបស់ខ្លួនផ្ទាល់។

លោក Konstantin Vorontsov អនុប្រធាននាយកដ្ឋានសម្រាប់ការមិនរីកសាយភាយ និងគ្រប់គ្រងអាវុធ នៃក្រសួងការបរទេសរុស្ស៊ី បានប្រាប់អង្គការសហប្រជាជាតិថា សហរដ្ឋអាមេរិក និងសម្ព័ន្ធមិត្ត កំពុងព្យាយាមប្រើប្រាស់ទីអវកាស ដើម្បីពង្រឹងការគ្រប់គ្រងរបស់លោកខាងលិច។

លោក Vorontsov និយាយថា ការប្រើប្រាស់ផ្កាយរណបលោកខាងលិច ដើម្បីជួយដល់កិច្ចខិតខំប្រឹងប្រែងសង្រ្គាមនៅអ៊ុយក្រែន គឺជានិន្នាការដ៏គ្រោះថ្នាក់បំផុត។ ហេដ្ឋារចនាសម្ព័ន្ធពាក់កណ្តាលស៊ីវិល អាចជាគោលដៅស្របច្បាប់សម្រាប់ការវាយប្រហារសងសឹក។ ការប្រើប្រាស់ផ្កាយរណបបែបនេះរបស់ខាងលិច ដើម្បីគាំទ្រអ៊ុយក្រែនគឺជា ការបង្កហេតុ។

យ៉ាងណាក្តី លោក Vorontsov មិនបាននិយាយពីក្រុមហ៊ុនផ្កាយរណបជាក់លាក់ណាមួយទេ ថ្វីបើលោក Elon Musk ធ្លាប់និយាយកាលពីដើមខែនេះថា ក្រុមហ៊ុន SpaceX របស់គាត់ នឹងបន្តផ្តល់មូលនិធិដល់សេវាអ៊ីនធឺណិត Starlink របស់ខ្លួននៅក្នុងប្រទេសអ៊ុយក្រែនក៏ដោយ។

គួរបញ្ជាក់ថា សង្រ្គាមនៅអ៊ុយក្រែន បានសម្លាប់មនុស្សរាប់ម៉ឺននាក់ បំផ្លាញការស្តារឡើងវិញនៃសេដ្ឋកិច្ចសកលក្រោយកូវីដ និងបង្កឲ្យមានការប្រឈមមុខដាក់គ្នាយ៉ាងធ្ងន់ធ្ងរជាមួយលោកខាងលិច ចាប់តាំងពីវិបត្តិមីស៊ីលគុយបាឆ្នាំ១៩៦២មក៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Reuters

ចុចអាន៖ ពូទីន បញ្ជាក់ថា អាវុធ ដែលលោកខាងលិច ផ្តល់ ទៅឲ្យ អ៊ុយក្រែន បានធ្លាយដល់ ទីផ្សារ ងងឹត