តួកគី ចាប់ខ្លួនមនុស្ស២២នាក់ ពាក់ព័ន្ធការបំផ្ទុះគ្រាប់បែក

នៅថ្ងៃចន្ទទី១៤ខែវិច្ឆិកានេះ រដ្ឋមន្ត្រីក្រសួងមហាផ្ទៃតួកគីលោក Suleyman Soylu បានស្តីបន្ទោសក្រុមសកម្មប្រយុទ្ធឃើដ ចំពោះការបំផ្ទុះដែលបានសម្លាប់មនុស្សចំនួន៦នាក់ នៅតំបន់លក់ទំនិញដ៏ពេញនិយមរបស់ទីក្រុងអ៊ីស្តង់ប៊ុល ហើយនិយាយថា ប៉ូលិសបានឃាត់ខ្លួនជនសង្ស័យចំនួន ២២នាក់ រួមទាំងអ្នកដែលបានបង្កៃគ្រាប់បែកផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Soylu និយាយថា ការវាយប្រហារលើវិថី Istiklal ក្នុងទីក្រុង អ៊ីស្តង់ប៊ុល ត្រូវបានបញ្ជាចេញពីទីក្រុង Kobani នៅភាគខាងជើងប្រទេសស៊ីរី ជាកន្លែងដែលកងកម្លាំងតួកគី ធ្វើប្រតិបត្តិការប្រឆាំងនឹងកងជីវពលឃើដ YPG របស់ស៊ីរី ក្នុងរយៈពេលប៉ុន្មានឆ្នាំថ្មីៗនេះ។

លោក Soylu បន្តថា “យើងវាយតម្លៃថា ការបញ្ជាឲ្យវាយប្រហារ គឺចេញពីទីក្រុង Kobani។ ​ជនបង្ក​ត្រូវ​បាន​ឃុំ​ខ្លួន​។​ មុននេះ ​មនុស្ស​ ២១ នាក់​ផ្សេង​ទៀត​ត្រូវ​បាន​ឃុំ​ខ្លួន​”។

មនុស្សចំនួន៥០នាក់ ត្រូវបានអនុញ្ញាតឲ្យចេញពីមន្ទីរពេទ្យ បន្ទាប់ពីការវាយប្រហារកាលពីថ្ងៃអាទិត្យ ដែលបង្កឲ្យមានក្តីព្រួយបារម្ភថា ប្រទេសតួកគី អាចត្រូវបានកំណត់គោលដៅដោយការទម្លាក់គ្រាប់បែកនិងការវាយប្រហារបន្ថែមទៀត ដូចកាលពីពាក់កណ្តាលឆ្នាំ ២០១៥ និង ២០១៧។

កាលពីមុន ទីក្រុងអ៊ីស្តង់ប៊ុល ​ត្រូវ​បានកំណត់គោលដៅដោយក្រុម​សកម្ម​ប្រយុទ្ធ​ឃើដ ក្រុមឥស្លាម​និយម និងក្រុម​ឆ្វេងនិយម។ ក្រុម PKK បានអះអាងទទួលខុសត្រូវចំពោះពីការបំផ្ទុះគ្រាប់បែកពីរដងនៅខាងក្រៅកីឡដ្ឋានបាល់ទាត់អ៊ីស្តង់ប៊ុលកាលពីខែធ្នូ ឆ្នាំ២០១៦ ដែលបានសម្លាប់មនុស្ស៣៨នាក់ និង១៥៥នាក់រងរបួស៕

ប្រែសម្រួល៖ Vann Vann

ប្រភព៖ Reuters

ចុចអាន៖ វីដេអូថតជាប់ស្តែងៗ ការវាយប្រហារភេរវកម្មនៅតួកគី ស្លាប់និងរបួសមនុស្សជិត ១០០នាក់