លោក Zelensky ចុះទៅតំបន់ Kherson ហើយប្តេជ្ញា បណ្តេញរុស្ស៊ី ចេញពីទឹកដីកាន់កាប់ទាំងអស់ (មានវីដេអូ)

ប្រធានាធិបតីអ៊ុយក្រែនលោក Volodymyr Zelensky បានមកដល់ទីក្រុង Kherson កាលពីថ្ងៃចន្ទទី១៤ខែវិច្ឆិកា ដោយទទួលបានការស្វាគមន៍យ៉ាងកក់ក្តៅ នៅក្នុងទីក្រុងទើបរំដោះបាន ខណៈប្រជាពលរដ្ឋ ប្រមូលផ្តុំគ្នាដើម្បីបង្ហូតទង់ជាតិអ៊ុយក្រែន។

ការដណ្តើមបានតំបន់ Kherson មកវិញគឺជាជ័យជម្នះដ៏ធំបំផុត ដែលកងទ័ពអ៊ុយក្រែនសម្រេចបានរហូតមកដល់ពេលនេះ ហើយលោក Zelensky បានប្តេជ្ញាបណ្តេញរុស្ស៊ី ចេញពីទឹកដីដែលកាន់កាប់ទាំងអស់។

លោកនិយាយថា “យើងត្រៀមខ្លួនរួចជាស្រេចសម្រាប់សន្តិភាព ប៉ុន្តែសន្តិភាពរបស់យើងសម្រាប់ប្រទេសរបស់យើង សម្រាប់ទឹកដីរបស់យើង។ យើងគោរពច្បាប់និងគោរពអធិបតេយ្យភាពរបស់ប្រទេសទាំងអស់ ប៉ុន្តែឥឡូវនេះយើងកំពុងនិយាយអំពីប្រទេសរបស់យើង ដូច្នេះហើយយើងកំពុងប្រឆាំងនឹងការលុកលុយរបស់រុស្ស៊ី”។

អមដោយអង្គរក្សប្រដាប់អាវុធ លោក Zelensky បានប្រាប់ក្រុមទាហានថា ពួកគេបានបង្ហាញឲ្យឃើញថា វាមិនអាចទៅរួចទេក្នុងការសម្លាប់អ៊ុយក្រែន។ បន្ទាប់មក លោកបានស្មិងស្មាធិ៍ដើម្បីគោរពដល់វិញ្ញាណក្ខន្ធកងទ័ព ដែលស្លាប់ក្នុងអំឡុងពេលវាយលុក។

ក្រោយពេលចាកចេញ ទាហានរុស្ស៊ីបានបន្សល់ទុកទីក្រុងបាក់បែក អគារ និងហេដ្ឋារចនាសម្ព័ន្ធត្រូវបានបំផ្លាញ ហើយផ្លូវនានាពោរពេញដោយគ្រាប់មីន។ ស្ពានតែមួយគត់ដែលតភ្ជាប់ទីក្រុង Kherson ទៅកាន់ទឹកដីដែលគ្រប់គ្រងដោយរុស្ស៊ី គឺត្រូវបានបំផ្លាញ។

លោក Zelensky និយាយថា មុននេះ អ៊ុយក្រែនបានប្រមូលព័ស្តុតាងនៃឧក្រិដ្ឋកម្មសង្រ្គាមយ៉ាងហោចណាស់៤០០ ដែលប្រព្រឹត្តដោយទាហានរុស្ស៊ីក្នុងអំឡុងពេលកាន់កាប់តំបន់របស់ពួកគេ រួមទាំងការសម្លាប់ និងការចាប់ពង្រត់ផងដែរ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Yahoo

ចុចអាន៖ ប្រជាជន អ៊ុយក្រែន សាទរ​កងទ័ពកាន់កាប់តំបន់ Kherson ឡើងវិញ ក្រោយ រុស្ស៊ី ដកទ័ព