តួកគី អាចវាយប្រហារ ស៊ីរី តាមផ្លូវគោកវិញម្ដង ក្រោយសម្រេចប្រតិបត្តិការ​តាមអាកាស

ប្រព័ន្ធផ្សព្វផ្សាយរបស់តួកគីបានរាយការណ៍ថា ការជោគជ័យវាយប្រហារតាមផ្លូវអាកាសលើក្រុមឃឺដនៅទឹកដីស៊ីរី អាចជាជំហ៊ានដំបូងឲ្យប្រទេសតួកគីឆ្ពោះទៅរកប្រតិបត្តិការតាមផ្លូវគោកផ្ទាល់តែម្ដង ។​

បើតាមប្រព័ន្ធផ្សព្វផ្សាយឃឺដផ្សាយថា ប្រទេសតួកគីបានបើកការវាយប្រហារតាមអាកាសម្តងទៀតប្រឆាំងនឹងទីក្រុង Kobani ភាគខាងជើងប្រទេសស៊ីរី ។

ដោយឡែកកាលពីថ្ងៃចន្ទកាសែតតួកគីរាយការណ៍ថា គោលដៅភេរវករចំនួន ៨៩ ត្រូវបានកម្ទេច អំឡុងពេលប្រតិបត្តិការផ្លូវអាកាសនៅក្នុងប្រទេសស៊ីរី និងអ៊ីរ៉ាក់ ហើយមេដឹកនាំ PKK ជាច្រើនត្រូវបានបោសសម្អាត ។

ចំណែកបើតាមក្រុមប្រឆាំងភេរវកម្មឃឺដ (CTG) បាននិយាយកាលពីថ្ងៃអាទិត្យថា ការវាយប្រហារជាង ២៥ លើកទៅលើទីតាំងរបស់ក្រុមប្រដាប់អាវុធឃឺដនៅក្នុងប្រទេសអ៊ីរ៉ាក់ និងនៅភាគខាងជើងប្រទេសស៊ីរី បានសម្លាប់ក្រុមសកម្មប្រយុទ្ធ​ YPG ចំនួន ៣២ នាក់ ។

ស្របពេលជាមួយគ្នានេះ យោងតាមក្រសួងការពារជាតិរបស់ប្រទេសតួកគីបានឲ្យដឹងដែរថា ប្រតិបត្តិការផ្លូវអាកាសសំដៅទៅលើ YPG ត្រូវបានអនុវត្តស្របតាមសិទ្ធិស្វ័យការពារក្រោមមាត្រា ៥១ នៃធម្មនុញ្ញអង្គការសហប្រជាជាតិ ។

ទន្ទឹមនោះ ប្រតិបត្តិការនេះត្រូវបានចាត់ទុកថាជាជំហ៊ានដំបូងមួយ ដែលអាចឲ្យតួកគី ឆ្ពោះទៅរកប្រតិបត្តិការនៅលើដីគោកក្នុងប្រទេសស៊ីរីដោយផ្ទាល់ ៕

ប្រែសម្រួលដោយ ៖ នាង រតនៈ

ប្រភព ៖ Sputnik

ចុចអាន ៖ អាមេរិក ញាប់ដៃញាប់ជើងរកការអភិវឌ្ឍអាវុធល្បឿនលឿនជាងសំឡេង ទុកប្រជែងចិន និងរុស្ស៊ី