រុស្ស៊ី ចាំតែនាំចេញជីទៅកាន់ទីផ្សារពិភពលោកប៉ុណ្ណោះ

ប្រធានាធិបតីរុស្ស៊ីលោក វ្ល៉ាឌីមៀរ ពូទីន បាននិយាយកាលពីថ្ងៃពុធថា ទីក្រុងមូស្គូបានត្រៀមខ្លួនរួចជាស្រេចក្នុងការពង្រីកការផ្គត់ផ្គង់ជី និងធ្វើការជាមួយដៃគូរទាំងអស់នៅក្នុងតំបន់ ។

ថ្លែងក្នុងជំនួបជាមួយលោក Dmitry Mazepin ដែលជា​ប្រធានគណៈកម្មការផលិតកម្ម និងជួញដូរជីនៃសហភាពឧស្សាហូបនីយកម្ម និងសហគ្រិនរុស្ស៊ី, លោក ពូទីន បានលើកឡើងថា បញ្ហាផ្គត់ផ្គង់ជីទៅកាន់ពិភពលោកនៅពេលនេះ គឺកំពុងតែជួបប្រទះបញ្ហា ដោយសារតែប្រទេសមួយចំនួន​​ ជាពិសេស គឺពួកអឺរ៉ុប បានបង្កើតរបាំងរារាំងការនាំចេញ ប៉ុន្តែ រុស្ស៊ី​ បានត្រៀមរួចរាល់ជាស្រេច សម្រាប់ផ្គត់ផ្គង់ដល់ដៃគូ ប៉ុន្តែការរារាំងនេះវិញទេ ដែលជះឥទ្ធិពលអវិជ្ជមានដល់ទីផ្សារពិភពលោកទាំងមូល ។

ជាមួយបញ្ហានេះ​ លោក Mazepin បានប្រាប់លោក ពូទីន វិញថា បច្ចុប្បន្នជីជាង ៤០ ម៉ឺនតោន គឺត្រូវបានឃាត់មិនឲ្យចែកចាយនៅក្នុងកំពង់ផែអឺរ៉ុប ដោយសារតែការដាក់ទណ្ឌកម្ម ។ ការឃាត់ទុកនេះ ជាស្ថានភាពដ៏ពិបាកបំផុត​របស់ក្រុមហ៊ុនសម្រាប់ចែកចាយជីទៅកាន់ទីផ្សារកំពុងអភិវឌ្ឍន៍ រួមទាំងបណ្តាប្រទេសនៅអាហ្វ្រិកផងដែរ ។

ដោយឡែក ចំពោះបញ្ហាប្រឈម លោកពូទីន​ និយាយថា ពេលនេះ អាជ្ញាធររុស្ស៊ីកំពុងទាក់ទងជាមួយអគ្គលេខាធិការអង្គការសហប្រជាជាតិ (UN) លោក Antonio Guterres និងមេដឹកនាំនៃប្រទេសអាហ្វ្រិកមួយចំនួនក្នុងគោលបំណងដើម្បីដកចេញនូវឧបសគ្គរារាំងទាំងឡាយ ៕

ប្រែសម្រួលដោយ ៖ នាង រតនៈ

ប្រភព ៖ Xinhua

ចុចអាន ៖ លោក ពូទីន បង្ហាញសារសំខាន់ការបង្រួបបង្រួមអតីតសាធារណរដ្ឋសូវៀត