ទីបំផុត Jack Ma លាលែងតំណែងជាប្រធានក្រុមអ្នកជំនួញ ចិន ក្រោយសំងំ​នៅ ជប៉ុន ៦ ខែ

ស្ថាបនិកក្រុមហ៊ុន Alibaba លោក Jack Ma បានលាលែងពីតំណែងជាប្រធានសមាគមទូទៅនៃសហគ្រិនចិន Zhejiang ជាក្រុមអាជីវកម្មដែលលោកបានបង្កើតឡើងនៅក្នុងខេត្តកំណើតរបស់លោក ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះយ៉ាងណា មហាសេដ្ឋីចិន ដែលបានបាត់ពីក្រសែភ្នែកសាធារណជនក្នុងរយៈពេលប៉ុន្មានឆ្នាំចុងក្រោយនេះ បន្ទាប់ពីការបង្រ្កាបរបស់រដ្ឋាភិបាលចិនលើវិស័យបច្ចេកវិទ្យា ត្រូវគេរាយការណ៍ថា បានផ្លាស់ប្តូរតួនាទីជាប្រធាន ទៅជាទីប្រឹក្សានៅក្នុងសមាគមនេះវិញ ។

ចំណែក លោក Nan Cunhui អនុប្រធាននៃសហព័ន្ធឧស្សាហកម្ម និងពាណិជ្ជកម្មចិន និងជាប្រធានក្រុមហ៊ុន ផ្តល់ដំណោះស្រាយថាមពលឆ្លាតវៃ CHINT ត្រូវបានជ្រើសរើសជាប្រធានសមាគមថ្មីនេះ ។

ក្រោមការដឹកនាំរបស់លោក Jack Ma, សមាគមដ៏មានឥទ្ធិពលនេះបានដើរតួយ៉ាងសំខាន់ក្នុងការជួយសហគ្រិនមួយចំនួនមកពីបណ្តាញខេត្តជាមួយនឹងទំនាក់ទំនងសំខាន់ៗនៅទូទាំង និងក្រៅប្រទេសចិន ។ ក្នុងអំឡុងពេលកាន់តំណែងរបស់លោក Jack Ma តែងតែថ្លែងសុន្ទរកថាល្អៗនៅឯពិធីជប់លៀងប្រចាំឆ្នាំរបស់ក្រុមសមាគម Zhejiang ខណៈនៅឆ្នាំនេះ លោក​មិន​បាន​ចូល​រួម​ព្រឹត្តិការណ៍​នេះ​ទេ ។

ទន្ទឹមនោះ មហាសេដ្ឋីរូបនេះក៏បានលាលែងពីតំណែងជាប្រធានប្រតិបត្តិរបស់ក្រុមហ៊ុន Alibaba កាលពីឆ្នាំ ២០១៩ ក្នុងវ័យ ៥៥ ឆ្នាំ ហើយចាប់តាំងពីពេលនោះមកគេមិនសូវឮដំណឹងពីលោក Jack Ma ប៉ុន្មានទេ រហូតទើបថ្មីៗនេះ គាត់ត្រូវបានគេប្រទះឃើញនៅក្នុងប្រទេសផ្សេងៗគ្នារួមទាំងអេស្ប៉ាញ និងហូឡង់ ។

បន្ថែមពីនេះ Jack Ma ត្រូវបានគេប្រទះឃើញកំពុងរស់នៅក្នុងវីឡាមួយកន្លែងលើផ្ទៃដីជិត ២ គីឡូម៉ែត្រការ៉េនៅតំបន់ Hakone ជាយក្រុងតូក្យូនៃប្រទេសជប៉ុនរយៈពេល ៦ ខែមកហើយផងដែរ ។ យោងតាមមនុស្សជិតស្និទ្ធនឹងលោកបានឲ្យដឹងថា Jack Ma បានចំណាយពេលខ្លះរបស់គាត់ដើម្បីពិនិត្យមើលពីរបៀបដំណើរការបច្ចេកវិទ្យានេសាទកសិកម្មនៅវិទ្យាស្ថានស្រាវជ្រាវវារីវប្បកម្មនៃសាកលវិទ្យាល័យ Kindai ដើម្បីលើកស្ទួយវិស័យកសិកម្មឲ្យកាន់តែប្រកបដោយនិរន្តរភាព ៕

ប្រែសម្រួលដោយ ៖ ជីវ័ន្ត

ប្រភព ៖ Yahoo

ចុចអាន ៖ ប៉ូលិសរឹបអូសលុយសុទ្ធ ១.៦៨ លានដុល្លារ រឿងពុករលួយម្ចាស់ផ្ទះ World Cup នៅកាតា របស់លោកស្រី Eva Kaili