ប៉ូលិស​បារាំង ​ឆែកឆេរ​ការិយាល័យ​​គណបក្ស របស់លោក Macron

ប៉ូលិសបារាំង បានឆែកឆេរទីស្នាក់ការគណបក្សនយោបាយ Renaissance របស់លោកប្រធានាធិបតី Emmanuel Macron និងការិយាល័យក្រុមហ៊ុនទីប្រឹក្សាសហរដ្ឋអាមេរិក McKinsey នៅក្នុងទីក្រុងប៉ារីស។

ការវាយឆ្មក់កាលពីថ្ងៃពុធទី១៤ខែធ្នូ គឺជាផ្នែកមួយនៃការស៊ើបអង្កេត លើការប្រើប្រាស់ទីប្រឹក្សាក្នុងអំឡុងពេលយុទ្ធនាការបោះឆ្នោតប្រធានាធិបតីដែលលោក Macron ទទួលជ័យជម្នះក្នុងឆ្នាំ២០១៧ដល់២០២២។

ទោះបីជាយ៉ាងណាក៏ដោយ ទាំងលោកប្រធានាធិបតី Macron និងក្រុមយុទ្ធនាការរបស់គាត់ គឺមិនត្រូវបានផ្តោតគោលដៅជាសាធារណៈ ដោយរដ្ឋអាជ្ញានោះទេ ហើយទាំងគណបក្ស Renaissance និងក្រុមហ៊ុន McKinsey សុទ្ធតែបាននិយាយថា ពួកគេកំពុងសហការជាមួយ ការស៊ើបអង្កេត។

អ្នកនាំពាក្យគណបក្ស Renaissance លោក Loic Signor បានប្រាប់ទីភ្នាក់ងារព័ត៌មាន AFP ថា “វាជារឿងធម្មតាទេសម្រាប់ប្រព័ន្ធតុលាការ ក្នុងការស៊ើបអង្កេតដោយសេរី និងឯករាជ្យ ដើម្បីបំភ្លឺលើរឿងនេះ”។

គួរបញ្ជាក់ថា ប្រទេសបារាំង​ មានច្បាប់តឹងរ៉ឹងទាក់ទងនឹងការផ្តល់ហិរញ្ញប្បទានដល់គណបក្សនយោបាយ និងយុទ្ធនាការបោះឆ្នោត។ ការ​ចំណាយជា​សាធារណៈ​លើ​ការ​ប្រឹក្សា​យោបល់ ​បាន​កើន​ឡើង​ក្នុង​អំឡុង​ពេល​កាន់​តំណែង​ដំបូង​របស់​លោក Macron៕

ប្រែសម្រួល៖​ Vann Vann

ប្រភព៖ BBC

ចុចអាន៖​ ឆ្នាំថ្មី បារាំង ចែកស្រោមអនាម័យ Free សម្រាប់អ្នកមានអាយុក្រោម ២៥ឆ្នាំ