លិចនាវាចម្បាំងថៃ កងម៉ារីនចំនួន៣៣នាក់ កំពុងបាត់ខ្លួន (មានវីដេអូ)

នៅថ្ងៃចន្ទទី១៩ខែធ្នូនេះ កងទ័ពជើងទឹករបស់ប្រទេសថៃ បានដាក់ពង្រាយនាវាចម្បាំង និងឧទ្ធម្ភាគចក្រ ដើម្បីស្វែងរកទាហានម៉ារីនចំនួន ៣៣ នាក់ ដែលបាត់ខ្លួន បន្ទាប់ពីនាវាមួយគ្រឿង លិចក្នុងឈូងសមុទ្រថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាវាកងទ័ពជើងទឹកចំនួន៣គ្រឿង និងឧទ្ធម្ភាគចក្រ២គ្រឿង ត្រូវបានបញ្ជូនទៅស្វែងរកអ្នកបាត់ខ្លួនក្នុងខេត្ត Prachuap Khiri Khan ភាគខាងត្បូងទីក្រុងបាងកក បន្ទាប់ពីនាវាចម្បាំង HTMS Sukhothai មានបញ្ហាម៉ាស៊ីន មុនពេលពាក់កណ្តាលអធ្រាត្រ នៅចម្ងាយ៣៧គីឡូម៉ែត្រពីឆ្នេរសមុទ្រ។

កងទ័ពជើងទឹកនិយាយថា បេសកកម្មជួយសង្គ្រោះពេញមួយយប់ក្នុងអាកាសធាតុអាក្រក់ បានធានាសុវត្ថិភាពមនុស្សចំនួន៧៣នាក់ក្នុងចំណោមមនុស្សទាំង ១០៦នាក់នៅលើនាវា ខណៈ៣៣នាក់កំពុងបាត់ខ្លួន។

កងទ័ពជើងទឹកបានបង្ហោះរូបភាព និងវីដេអូនៅលើគណនី Twitter របស់ខ្លួន ដែលបង្ហាញពីបុគ្គលិកមួយក្រុមពាក់អាវកាក់ពណ៌ទឹកក្រូច កំពុងជួយសង្គ្រោះមនុស្សក្នុងភាពងងឹត ទាំងដែលមានទឹករលកធំៗ។

ឧត្តមនាវីទោ Pogkrong Monthardpalin អ្នកនាំពាក្យកងទ័ពជើងទឹកបាននិយាយថា នាវា Sukhothai ដែលជានាវាផលិតដោយសហរដ្ឋអាមេរិក ដាក់ឲ្យប្រើប្រាស់ចាប់តាំងពីឆ្នាំ១៩៨៧មកនោះ ត្រូវបានទឹករលកធំៗបោកបក់វាយប្រហារ កាលពីថ្ងៃអាទិត្យ ដោយធ្វើឲ្យវាផ្អៀងទៅម្ខាង មុនពេលលិចចូលសមុទ្រ៕

សូមទស្សនាវីដេអូ៖

ប្រែសម្រួល៖​ Vann Vann

ប្រភព៖ CNA

ចុចអាន៖ នាវាចម្បាំង អាមេរិក ឆ្លងកាត់ច្រកសមុទ្រ តៃវ៉ាន់ ដ៏រសើបម្តងទៀត កាន់តែជះកំហឹងដល់ ចិន