Elon Musk ប្រាប់បុគ្គលិក Tesla កុំឲ្យខ្វល់រឿងទីផ្សារភាគហ៊ុនធ្លាក់ចុះ រំខានដល់ការងារ

នាយកប្រតិបត្តិក្រុមហ៊ុន Tesla លោក Elon Musk បានប្រាប់និយោជិតទាំងអស់ថា មិនត្រូវបារម្ភពីការធ្លាក់ចុះនៃទីផ្សារភាគហ៊ុននោះឡើយ ដែលនាំឲ្យរំខានដល់ការងារ បន្ទាប់ពីភាគហ៊ុនរបស់ Tesla បានធ្លាក់ចុះ​ ១១ ភាគរយ កាលពីថ្ងៃអង្គារ និងជិត ៧០ ភាគរយនៅក្នុងឆ្នាំនេះ ស្របពេលតម្រូវការរថយន្តក៏មានភាពមិនសូវប្រសើរ រួមផ្សុំជាមួយការទិញបាន Twitter របស់លោក Musk កំពុងធ្វើឲ្យមានភាពច្របូកច្របល់ផងដែរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃពុធ Elon Musk បានផ្ញើរអ៊ីមែលទៅកាន់បុគ្គលិករបស់ខ្លួនដោយសារសេរថា លោកមានភាពជឿជាក់ថា ក្នុងរយៈពេលវែង​ Tesla នឹងក្លាយជាក្រុមហ៊ុនដ៏មានតម្លៃបំផុតនៅលើផែនដី ។

ជាមួយគ្នានោះ លោកក៏បានជំរុញឲ្យនិយោជិតរបស់លោក បង្កើនការដឹកជញ្ជូនរថយន្តនៅចុងត្រីមាសនេះ បន្ទាប់ពីក្រុមហ៊ុនបានផ្តល់ការបញ្ចុះតម្លៃលើយានយន្តរបស់ខ្លួននៅសហរដ្ឋអាមេរិក និងប្រទេសចិន ។

ទន្ទឹមនឹងនោះ ក្រុមអ្នកវិភាគរំពឹងថាក្រុមហ៊ុន Tesla នឹងចែកចាយរថយន្តចំនួន ៤៤២,៤៥២ គ្រឿងនៅក្នុងត្រីមាសទី ៤ ។ នេះបើយោងតាមទិន្នន័យរបស់ Refinitiv ។

ដោយឡែក អ្នកវិភាគ Morgan Stanley បាននិយាយថា រយៈពេល ២ ឆ្នាំចុងក្រោយនៃតម្រូវការលើសពីការផ្គត់ផ្គង់នឹងត្រូវបានត្រឡប់មកវិញជាមួយនឹងការផ្គត់ផ្គង់លើសពីតម្រូវការក្នុងឆ្នាំ ២០២៣ ៕

ប្រែសម្រួលដោយ ៖ រតនៈ

ប្រភព ៖ Yahoo