ព័ត៌មានអន្ដរជាតិ

រុស្ស៊ី កម្ទេចអាវុធ អាមេរិក ផ្ដល់ឲ្យ អ៊ុយក្រែន ដណ្ដើមបានភូមិចំនួន ២ ទៀត

បានផុស

២ years មុន

នៅ

ថ្ងៃអង្គារ ២៤ មករា ២០២៣

ដោយ

ក្រសួងការពារជាតិរុស្ស៊ីបានអះអាងកាលពីថ្ងៃចន្ទថា កងកម្លាំងទីក្រុងមូស្គូបានគ្រប់គ្រងភូមិ Krasnopolivka ភាគខាងជើងនៃទីក្រុង Soledar ក្នុងតំបន់ Donetsk ភាគខាងកើតអ៊ុយក្រែន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីថ្លែងការណ៍របស់ក្រសួងការពារជាតិរុស្ស៊ីបានប្រកាសថា យោធាអ៊ុយក្រែនជាង ៦០ នាក់ត្រូវបានសម្លាប់ ខណៈដែលរថពាសដែកប្រយុទ្ធ ៥ គ្រឿង, កាំភ្លើងយន្តប្រភេទ MSTA-B និង D-30 ចំនួន ២ គ្រឿង ក៏ដូចជារ៉ាដាកំណត់គោលដៅ AN/TPQ-50 ដែលផលិតដោយសហរដ្ឋអាមេរិក ត្រូវបានបំផ្លាញក្នុងការវាយដណ្ដើមបាននោះ ។

សេចក្តីថ្លែងការណ៍បានអះអាងបន្ថែមទៀតថា ការវាយប្រហារមួយទៀតដោយយោធារុស្ស៊ីលើចំណុចដាក់ពង្រាយបណ្តោះអាសន្នរបស់កងទ័ពអ៊ុយក្រែន នៅភូមិ Marhanets ក្នុងតំបន់ Dnipropetrovsk ភាគអាគ្នេយ៍អ៊ុយក្រែន ក៏បានបំផ្លាញប្រព័ន្ធរ៉ុកកែត HIMARS ផលិតដោយសហរដ្ឋអាមេរិកផងដែរ ។

គួររំឭកថា ក្រសួងការពារជាតិរុស្ស៊ីបានអះអាងកាន់កាប់ទីក្រុង Soledar របស់អ៊ុយក្រែនកាលពីថ្ងៃសុក្រសប្តាហ៍មុន ខណៈទីក្រុងមួយនេះមានទីតាំងនៅជិតទីក្រុងយុទ្ធសាស្ត្រ Bakhmut ភាគខាងកើតអ៊ុយក្រែន ដែលជាមជ្ឈមណ្ឌលដឹកជញ្ជូនដ៏ធំដែលកងទ័ពអ៊ុយក្រែនប្រើការដើម្បីផ្គត់ផ្គង់អាវុធ ឧបករណ៍យោធា និងគ្រាប់រំសេវជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ រុស្ស៊ី បង្កើនការវាយសង្គ្រុបនៅភាគខាងត្បូង អ៊ុយក្រែន បន្ថែមលើការលុក លុយនៅភាគខាងកើត