ប្រធានាធិបតីអ៊ុយក្រែនលោក Vladimir Zelensky បានរិះគន់ទីក្រុងវ៉ាស៊ីនតោន ចំពោះភាពយឺតយ៉ាវក្នុងការបញ្ជូនរថក្រោះធុនធ្ងន់ទៅកាន់ប្រទេសអ៊ុយក្រែន។ នៅក្នុងបទសម្ភាសន៍ជាមួយ Sky News កាលពីថ្ងៃសុក្រទី២៧ខែមករា មេដឹកនាំអ៊ុយក្រែនរូបនេះ ក៏បានព្រមានដែរថា ទីក្រុងកៀវ នឹងមិនពេញចិត្តទេដែលលោកខាងលិច ផ្តល់រថក្រោះឲ្យតិចពេក។

ការអត្ថាធិប្បាយរបស់លោក Zelensky កើតឡើងបន្ទាប់ពីសហរដ្ឋអាមេរិកសន្យាផ្គត់ផ្គង់រថក្រោះ M1 Abrams ចំនួន៣១គ្រឿងឲ្យទីក្រុងកៀវ ប៉ុន្តែបានព្រមានថា ការដឹកជញ្ជូនអាចចំណាយពេលច្រើនខែ ឬលើសនេះ។ សេតវិមានបានពន្យល់ថា ខ្លួននឹងយករថក្រោះចេញពីក្រុមហ៊ុនផលិត មិនមែនចេញពីស្តុកដែលមានស្រាប់នោះទេ។

ទោះបីជាយ៉ាងណាក៏ដោយ លោក Zelensky បានត្អូញត្អែរថា ប្រសិនបើរថក្រោះអាមេរិកមកដល់នៅចុងខែសីហានោះ វានឹងយឺតពេលហើយ។

ប្រធានាធិបតីអ៊ុយក្រែនបានប្រាប់ Sky News ថា បច្ចុប្បន្នទីក្រុងកៀវ ត្រូវការរថក្រោះពី៣០០ទៅ៥០០គ្រឿង ដើម្បីអាចចាប់ផ្តើមការវាយលុកប្រឆាំងនឹងរុស្ស៊ីបាន។

យ៉ាងណាក្តី លោក Zelensky ក៏បានថ្លែងអំណរគុណដល់បណ្តាប្រទេស ដែលបាននិងកំពុងផ្តល់អាវុធដល់អ៊ុយក្រែនផងដែរ ហើយបានកត់សម្គាល់ថា មានប្រទេសសរុបចំនួន១២ បានប្តេជ្ញាចិត្តបញ្ជូនរថក្រោះឲ្យទីក្រុងកៀវ។

កាលពីដើមសប្តាហ៍នេះ ប្រទេសអាល្លឺម៉ង់ បានអនុម័តជាផ្លូវការនូវការផ្គត់ផ្គង់រថក្រោះ Leopard 2A6 ចំនួន១៤គ្រឿងដល់ទីក្រុងគៀវ ពីស្តុករបស់ខ្លួន។

ប្រទេស​ផ្សេង​ទៀត​ដែល​​សន្យា​ផ្តល់​គ្រឿង​សឹកធុន​ធ្ងន់​ដល់​ទីក្រុង​កៀវ រួម​មាន ចក្រភព​អង់គ្លេស ប៉ូឡូញ កាណាដា អេស្ប៉ាញ ន័រវែស និង​ហូឡង់៕

ប្រែសម្រួល៖ Vann Vann

ប្រភព៖ RT

ចុចអាន៖ ប្រភពមួយទម្លាយថា សមាជិកណាតូ បានផ្តល់យន្តហោះចម្បាំងឲ្យអ៊ុយក្រែន ដោយសម្ងាត់