ថៃ មានពលរដ្ឋស្លាប់ ក្នុងគ្រោះរញ្ជួយដីនៅ តួកគី

ស្រ្តីជនជាតិថៃម្នាក់ ​ត្រូវ​បានគ្រួសារបញ្ជាក់ថា បាត់បង់ជីវិតក្នុង​គ្រោះ​រញ្ជួយ​ដី​ដ៏​ធំ នៅ​ប្រទេស​តួកគី​នា​ពេល​ថ្មីៗ​នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការរញ្ជួយដីដែលបានវាយប្រហារប្រទេសតួកគី កាលពីថ្ងៃចន្ទទី០៦ខែកុម្ភៈ បានសម្លាប់ស្ត្រីជនជាតិថៃអាយុ២៩ឆ្នាំឈ្មោះ Nong Dao។ Nong Dao ត្រូវ​បាន​គេ​រក​ឃើញ​នៅ​ក្រោម​អគារ​បាក់បែកក្នុងទីក្រុង Iskenderun។

បច្ចុប្បន្ន ស្ថានទូតថៃប្រចាំប្រទេសតួកគី បាននិងកំពុងធ្វើការយ៉ាងជិតស្និទ្ធ ជាមួយអាជ្ញាធរតួកគី ដើម្បីនាំយកសាកសពរបស់នាងត្រលប់មកស្រុកកំណើតរបស់នាងវិញ ក្នុងខេត្ត Chaiyaphum ភាគឦសានប្រទេសថៃ។

តាមការបញ្ជាក់ពីគ្រួសារ, Nong Dao បានធ្វើការជាអ្នកម៉ាស្សានៅប្រទេសហ្ស៊កដានីអស់រយៈពេលជាង៥ឆ្នាំ មុនពេលផ្លាស់ទៅធ្វើការនៅតួកគី បន្ទាប់ពីស្ថានភាពជំងឺកូវីដ១៩ ចាប់ផ្តើមប្រសើរឡើង។

យោងតាមតួលេខគិតត្រឹមម៉ោង៣រសៀលថ្ងៃព្រហស្បតិ៍ទី០៩ខែកុម្ភៈ, មនុស្សជាង ១៥០០០នាក់បានស្លាប់ និងរាប់ម៉ឺននាក់រងរបួស បន្ទាប់ពីគ្រោះរញ្ជួយដីកម្រិត ៧.៨រ៉ិចទ័រ វាយប្រហារប្រទេសតួកគី និងភាគខាងជើងប្រទេសស៊ីរីកាលពីថ្ងៃចន្ទ។

លក្ខខណ្ឌ​អាកាសធាតុ​ដ៏ត្រជាក់ បូករួមទាំងកង្វះខាតសម្ភារបរិក្ខារធុនធ្ងន់ និងធនធានគួបផ្សំជាមួយនឹងផ្លូវដែលត្រូវបំផ្លិចបំផ្លាញ បានធ្វើឲ្យក្រុមជួយសង្គ្រោះ ជួបផលលំបាកក្នុងការបំពេញការងាររបស់ពួកគេ៕

ប្រែសម្រួល៖ Vann Vann

ប្រភព៖ Thaiger

ចុចអាន៖ ថៃ ផ្ដល់ជំនួយដល់តួកគី ក្រោយប្រជាជនរបស់ខ្លួន ៤នាក់ ទទួលរងគ្រោះ