តើ​យន្តហោះ​ចម្បាំង​ប្រភេទ​ណា ​ដែល​អង់គ្លេស​​អាចបញ្ជូន​ទៅ ​អ៊ុយក្រែន បាន?

កាលពីប៉ុន្មានថ្ងៃមុននេះ នាយករដ្ឋមន្ត្រីអង់គ្លេសលោក Rishi Sunak បានពិចារណាអំពីថាតើយន្តហោះចម្បាំងប្រភេទណា ដែលទីក្រុងឡុងដ៍ អាចបញ្ជូនទៅឲ្យអ៊ុយក្រែនបាន ដើម្បីជំរុញកិច្ចខិតខំប្រឹងប្រែងរបស់ទីក្រុងកៀវ ក្នុងការទប់ទល់ជាមួយរុស្ស៊ី។

ពេលនោះ នាយករដ្ឋមន្ត្រីរូបនេះ បានស្នើឲ្យរដ្ឋមន្ត្រីការពារជាតិ Ben Wallace ពិនិត្យថាតើយន្តហោះប្រភេទណាដែលចក្រភពអង់គ្លេសអាចផ្តល់ទៅឲ្យទីក្រុងកៀវបាន។

នេះគឺឆ្លើយតបទៅនឹងការអង្វរកររបស់លោក Volodymyr Zelensky សុំឲ្យសម្ព័ន្ធមិត្តលោកខាងលិច ផ្តល់ការគាំទ្រផ្លូវអាកាស។

ដូច្នេះ តើ​យន្តហោះ​ចម្បាំង​ប្រភេទ​ណា​ដែល​អង់គ្លេស​មាននាពេល​បច្ចុប្បន្ន ហើយ​អាចបញ្ជូន​ទៅ​អ៊ុយក្រែនបាន?

យន្តហោះចម្បាំងព្យុះទីហ្វុង

អតីតនាយករដ្ឋមន្ត្រីលោក Boris Johnson បានកត់សម្គាល់ថា ចក្រភពអង់គ្លេសបច្ចុប្បន្នមានយន្តហោះ ព្យុះទីហ្វុង ជាង១០០គ្រឿង ខណៈលោកតម្រូវឲ្យផ្តល់ទៅទីក្រុង កៀវ។

ព្យុះទីហ្វុង ត្រូវបានពិពណ៌នាដោយកងទ័ពអាកាសអង់គ្លេស ថាជាយន្តហោះចម្បាំងពហុមុខងារ ដែលមានសមត្ថភាពខ្ពស់ និងរហ័សរហួនបំផុត។

វាមានល្បឿនអតិបរមា ២២២២គីឡូម៉ែត្រក្នុងមួយម៉ោង ហើយអាចហោះហើរបានខ្ពស់ ក្នុងកម្ពស់រហូតដល់ ១៦.៧គីឡូម៉ែត្រពីដី។

ក្នុងចំណោមគ្រឿងសព្វាវុធរបស់វា ព្យុះទីហ្វុង អាចផ្ទុកមីស៊ីលបាញ់ពីអាកាសទៅអាកាស Meteor, គ្រាប់បែក Paveway និងមីស៊ីលបាញ់ពីអាកាសមកដី Storm Shadow និង Brimstone។

យន្តហោះចម្បាំង F-35

យន្តហោះចម្បាំង F-35 Lightning មានឧបករណ៍ចាប់សញ្ញាកម្រិតខ្ពស់ និងបច្ចេកវិទ្យាបំបាំងកាយ ដែលមានន័យថា វាអាចត្រូវបានប្រើនៅក្នុងការឈ្លបយកការណ៍ ក៏ដូចជាតួនាទីផ្សេងៗទៀតផងដែរ។

វា​អាច​បំបាំងកាយ​នៅ​ក្នុង​ដែនអាកាស​ដែល​មាន​អរិភាព ហើយ​អាច​ចែករំលែក​ព័ត៌មាន​ដោយ​ប្រើ​តំណ​ទិន្នន័យ​សុវត្ថិភាព។

សមត្ថភាពហោះឡើង និងចុះចតដោយបញ្ឈររយៈពេលខ្លីរបស់វា អនុញ្ញាតឲ្យវា ហោះចេញពីនាវាផ្ទុកយន្តហោះ Queen Elizabeth ក៏ដូចជានាវាស្រដៀងគ្នានៃប្រទេសផ្សេងទៀត និងផ្លូវយន្តហោះខ្លីៗផងដែរ។

វាអាចហោះហើរក្នុងល្បឿនអតិបរមា ១៩៧៥គីឡូម៉ែត្រក្នុងមួយម៉ោង និងមានរយៈកម្ពស់អតិបរមា ១៥គីឡូម៉ែត្រ ខណៈរង្វង់នៃការប្រយុទ្ធគឺ ៨៣៣គីឡូម៉ែត្រ។

ជាធម្មតា F-35 ត្រូវបានបំពាក់ដោយមីស៊ីលបាញ់ពីអាកាសទៅអាកាសចំនួនពីរគ្រាប់ និងគ្រាប់បែកចំនួនពីរគ្រាប់៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ រុស្ស៊ី គំរាមឆ្លើយតបធ្វើឲ្យពិភពលោកទាំងមូលជួបផលវិបាក បើសិន អង់គ្លេស ផ្តល់យន្តហោះចម្បាំងឲ្យ អ៊ុយក្រែន