សម្ព័ន្ធមិត្តលោកខាងលិច ប្ដេជ្ញាគាំទ្រឲ្យ អ៊ុយក្រែន វាយលុកទៅ រុស្ស៊ី វិញ

សម្ព័ន្ធមិត្ត​លោកខាងលិចរបស់អ៊ុយក្រែន​និយាយ​ថា ពួកគេសន្យានឹងគាំទ្រអ៊ុយក្រែនក្នុងការវាយលុកទៅកាន់រុស្ស៊ីវិញនៅចន្លោះខែមេសា និងឧសភាខាងមុខ បន្ទាប់ពីកងទ័ពទីក្រុងមូស្គូ​បាន​ចាប់​ផ្តើម​សមរភូមិ​ថ្មី​នៅ​ភាគ​ខាង​កើត ។

មន្ត្រីការពារជាតិមកពី ៥០ ប្រទេសបានប្រមូលផ្តុំគ្នានៅទីក្រុងប្រ៊ុចសែលកាលពីថ្ងៃអង្គារ ដោយនិយាយថា វាគឺជាពេលវេលាដ៏សំខាន់សម្រាប់សន្តិសុខរបស់ពួកគេ ហើយប្រទេសសម្ព័ន្ធមិត្តទាំងនេះនឹងនៅពីក្រោយ ក៏ដូចជាគាំទ្រអ៊ុយក្រែនជានិច្ច ដើម្បីប្រយុទ្ធស្វែងរកសេរីភាព ។​

ទន្ទឹមនោះ រដ្ឋមន្ត្រីការពារជាតិអាមេរិកលោក Lloyd Austin បាននិយាយថា អ្វីដែលអ៊ុយក្រែនត្រូវធ្វើដំបូងគេ គឺបង្កើនសន្ទុះ និងបង្កើតលក្ខខណ្ឌដែលល្អនៅលើសមរភូមិប្រយុទ្ធ ។

ចំណែកពាក់ព័ន្ធនឹងការមិនផ្ដល់យន្តហោះចម្បាំងដល់អ៊ុយក្រែន, លោក Austin បញ្ជាក់​ថា រដ្ឋមន្ត្រី​ការពារជាតិ​មិន​ឃើញ​មាន​សញ្ញា​ណា​មួយ​ដែល​បង្ហាញ​ថា ​រុស្ស៊ី​កំពុង​ត្រៀម​ខ្លួន​សម្រាប់​ការ​វាយប្រហារ​តាម​អាកាស​ដ៏ធំ​នោះ​ទេ ទើបយើងសម្រេចចិត្តមិនបញ្ជូនសព្វាវុធបែបនេះ ទោះបីជាមេដឹកនាំ​អ៊ុយក្រែន​បាន​ស្នើ​ឲ្យសម្ព័ន្ធមិត្ត​ផ្គត់ផ្គង់​យន្តហោះ​ដល់​ពួកគេក៏ដោយ​ ។

មកដល់ពេលនេះ ទាហានរុស្ស៊ីកំពុងវាយលុកកយ៉ាងសន្ធប់ ដើម្បីដណ្តើមយកទីក្រុង Bakhmut ដែល​ពួកគេ​មើល​ឃើញ​ថា ទីតាំងដ៏ល្អមួយ​នៅ​ភាគ​ខាង​កើត ប៉ុន្តែទោះជាយ៉ាងណាក៏ដោយ មន្ត្រីអាមេរិកនិយាយថា ជ័យជម្នះនៅទីនោះ នឹងមិនមានឥទ្ធិពលជាយុទ្ធសាស្ត្រលើសង្គ្រាមទាំងមូលនោះទេ ៕

ប្រែសម្រួលដោយ ៖ នាង រតនៈ

ប្រភព ៖​ NHK

ចុចអាន ៖ ប្រមុខ ណាតូ ថាមិនជាប់ពាក់ព័ន្ធជម្លោះជាមួយ រុស្ស៊ី ទេ ប៉ុន្តែនឹងបន្តផ្ដល់ អាវុធឲ្យ អ៊ុយក្រែន