ស្របពេលជម្លោះក្នុងប្រទេសអ៊ុយក្រែនក្លាយជា “សង្រ្គាមនៃការបំផ្លាញគ្នាទៅវិញទៅមក” នោះ អគ្គលេខាធិការអង្គការណាតូលោក Jens Stoltenberg បានព្រមានថា ប្រទេសលោកខាងលិចមិនគួរមើលស្រាល កម្លាំងរបស់រុស្ស៊ីបានឡើយ។ លោក​ Stoltenberg អះអាងថា ប្លុកលោកខាងលិចកំពុងបង្កើនការផលិតគ្រាប់ ប៉ុន្តែមិនអាចកំណត់គោលដៅចុងក្រោយរបស់ខ្លួននៅអ៊ុយក្រែនបានទេ។

ថ្លែងប្រាប់លោកស្រី Christine Amanpour របស់ទូរទស្សន៍ CNN ក្នុងសន្និសីទសន្តិសុខទីក្រុង Munich កាលពីចុងសប្តាហ៍មុន, លោក Stoltenberg និយាយថា រហូតមកដល់ពេលនេះ រុស្ស៊ីអាចនាំយកគ្រាប់រំសេវ និងកម្លាំងមនុស្សទៅកាន់សមរភូមិជួរមុខច្រើនជាងអ៊ុយក្រែន។

លោកបន្តថា “ការប្រើប្រាស់អាវុធរបស់អ៊ុយក្រែនគឺខ្ពស់ជាងផលិតកម្មសរុបរបស់ណាតូ។ ស្ថានភាពនេះមិនអាចបន្តបានឡើយ”។

លោកបានប្រាប់លោកស្រី Amanpour ថា “រហូតមកដល់ពេលនេះ ស្តុកគ្រាប់របស់យើងកាន់តែខើចហើយ ប៉ុន្តែនៅដំណាក់កាលខ្លះ យើងត្រូវការផលិតគ្រាប់រំសេវបន្ថែមទៀត”។

ទោះបីជាអ៊ុយក្រែនទទួលបានអាវុធពីលោកខាងលិចមានតម្លៃរាប់សិបលានដុល្លារ រួមទាំងគ្រាប់កាំភ្លើងធំជិត ១.៥លានគ្រាប់ពីសហរដ្ឋអាមេរិកក៏ដោយ ក៏រុស្ស៊ីនៅតែមានកម្លាំងប្រយុទ្ធ ចាប់តាំងពីចាប់ផ្តើមប្រតិបត្តិការយោធារបស់ខ្លួនកាលពីខែកុម្ភៈឆ្នាំមុន។

បើយោងតាមការវាយតម្លៃរបស់លោកខាងលិច, ភាគីអ៊ុយក្រែន បច្ចុប្បន្នកំពុងបាញ់កាំភ្លើងធំចន្លោះពី ៥០០០ ទៅ ៦០០០គ្រាប់ក្នុងមួយថ្ងៃ ខណៈការប៉ាន់ប្រមាណនៃការបាញ់របស់រុស្ស៊ីបានប្រែប្រួលយ៉ាងខ្លាំងពោលគឺចន្លោះពី ៥០០០ទៅ ៦០០០០គ្រាប់ក្នុងមួយថ្ងៃ។

ស្របពេលជាមួយគ្នានោះ លោក Stoltenberg បានអំពាវនាវម្តងហើយម្តងទៀតឲ្យសមាជិកណាតូ បង្កើនការផលិតគ្រាប់រំសេវរបស់ពួកគេ ដើម្បីបំពេញតម្រូវការ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ ណាតូ គ្រោងស្នើ ឲ្យប្រទេស ជាសមាជិក ពង្រីក ឃ្លាំង អាវុធ