អាមេរិក ព្រមានហើយព្រមានទៀត កុំឲ្យចិន ផ្តល់សព្វាវុធសាហាវ ទៅ រុស្ស៊ី (មានវីដេអូ)

មន្ត្រីជាន់ខ្ពស់ម្នាក់បាននិយាយកាលពីថ្ងៃអាទិត្យទី២៦ខែកុម្ភៈថា សហរដ្ឋអាមេរិកមានទំនុកចិត្តថា ចិនកំពុងពិចារណាផ្តល់សម្ភារសាហាវ ដើម្បីគាំទ្រដល់កងកម្លាំងរុស្ស៊ីដែលវាយលុកអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហើយថ្វីបើអាមេរិកមិនទាន់ឃើញសញ្ញាដែលទីក្រុងប៉េកាំងបានធ្វើដូច្នេះនៅឡើយក៏ដោយ ប៉ុន្តែពួកគេបានគូសបញ្ជាក់សាររបស់សហរដ្ឋអាមេរិកកាលពីចុងសប្តាហ៍ថា ប្រទេសចិនមិនគួរឆ្លងកាត់បន្ទាត់ក្រហមនោះទេ។

នាយក CIA លោក William Burns បានប្រាប់ CBS កាលពីថ្ងៃអាទិត្យក្នុងបទសម្ភាសដ៏កម្រមួយថា “យើងមានទំនុកចិត្តថា ថ្នាក់ដឹកនាំចិនកំពុងពិចារណាផ្តល់ឧបករណ៍សាហាវ ដល់ប្រទេសរុស្ស៊ី”។ ប៉ុន្តែលោកបានបន្ថែមថា “យើងក៏មិនទាន់ឃើញថា ការសម្រេចចិត្តចុងក្រោយនេះត្រូវបានធ្វើឡើងនោះទេ ហើយយើងក៏មិនទាន់មានព័ស្តុតាងនៃការនាំចេញពិតប្រាកដនៃឧបករណ៍សាហាវៗនោះដែរ”។

មន្ត្រីអាមេរិក បានបើកការវាយលុកផ្នែកការទូតទ្រង់ទ្រាយធំមួយកាលពីសប្តាហ៍មុន ដើម្បីព្រមានប្រទេសចិន ប្រឆាំងនឹងការផ្តល់ជំនួយដ៍សាហាវបែបនេះ ដែលក្រុមអ្នកជំនាញនិយាយថា អាចជះឥទ្ធិពលយ៉ាងខ្លាំងដល់សង្រ្គាមនៅអ៊ុយក្រែន។

របាយការណ៍ប្រព័ន្ធផ្សព្វផ្សាយ រួមទាំងនៅក្នុងកាសែត The Wall Street Journal និង NBC ផងដែរបានឲ្យដឹងថា ប្រទេសចិន កំពុងថ្លឹងថ្លែងថាតើត្រូវផ្តល់យន្តហោះគ្មានមនុស្សបើក និងគ្រាប់បែកមួយចំនួនដល់រុស្ស៊ីដែរឬក៏អត់។

កាលពីដើមខែនេះ រដ្ឋមន្ត្រីការបរទេសអាមេរិកលោក Antony Blinken បានចែករំលែកក្តីព្រួយបារម្ភរបស់ទីក្រុងវ៉ាស៊ីនតោនដោយផ្ទាល់ ជាមួយអ្នកការទូតកំពូលរបស់ប្រទេសចិនគឺលោក Wang Yi ក្នុងអំឡុងកិច្ចប្រជុំដ៏តានតឹងមួយ។

ដោយឡែកកាល​ពី​ថ្ងៃ​ពុធសប្តាហ៍មុន លោក Wang បាន​ជួបលោក Putin ​នៅ​ទីក្រុង​មូស្គូ​ ដោយ​បាន​គូសបញ្ជាក់​អំពី​ទំនាក់ទំនង​ជិតស្និទ្ធ​រវាង​ប្រទេសចិននិងរុស្ស៊ីខណៈលោក Jake Sullivan ទីប្រឹក្សាសន្តិសុខជាតិរបស់សហរដ្ឋអាមេរិក បានគូសបញ្ជាក់ថា សហរដ្ឋអាមេរិកនឹងនៅតែប្រុងប្រយ័ត្ន អំពីការផ្គត់ផ្គង់យោធារបស់ចិនដល់ប្រទេសរុស្ស៊ី ហើយវានឹងមានផលវិបាក ប្រសិនបើទីក្រុងប៉េកាំងបញ្ជូនអាវុធដ៍សាហាវមែន៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ CNA

ចុចអាន៖ លោក Zelensky ចង់ជួបប្រធានាធិបតី ចិន