ជំនួយការលោក Zelensky ថា បើអនុញ្ញាតឲ្យមនុស្សប្រុសចាកចេញពីប្រទេស, អ៊ុយក្រែន នឹងចប់! (មានវីដេអូ)

ជំនួយការកំពូលរបស់លោក Vladimir Zelensky បានចេញមុខការពារសេចក្តីសម្រេចរបស់ទីក្រុងកៀវ ក្នុងការហាមឃាត់មនុស្សប្រុសមិនឲ្យចាកចេញពីប្រទេស។ លោក Mikhail Podoliak បាន​ប្រាប់​ទីភ្នាក់ងារ​រដ្ឋ​អាល្លឺម៉ង់ DW ថា ​ការ​គេច​ចេញ​ពីការកែនទ័ពមានន័យថា ពួកគេ​ចង់​ឲ្យ​អ៊ុយក្រែន​ខ្ទេច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Podoliak បានប្រាប់ DW នៅក្នុងបទសម្ភាសមួយ កាលពីថ្ងៃចន្ទទី២៧ខែកុម្ភៈថា “ចូរ​យើង​និយាយ​ត្រង់ចំណុច​នេះ​ មិនចាំបាច់ស្មានទេ។ តើការរឹតត្បិតសិទ្ធិមានន័យដូចម្តេច? តើប្រជាជននៅអ៊ុយក្រែនមិនមានកាតព្វកិច្ចទេឬ? ។ រដ្ឋ​មាន​ភារកិច្ច​ផ្តល់​របស់​របរ ឲ្យ​មនុស្ស​ធ្វើ​ដំណើរ ឲ្យ​មនុស្ស​រស់​នៅ​តាម​ចិត្ត។ មែនហើយ ក្នុង​ពេល​មាន​សន្តិភាព ប៉ុន្តែ​ក្នុង​សម័យ​សង្គ្រាម វា​មិន​មែន​ជា​សំណួរ​ដែល​ត្រូវ​លើក​ឡើងនោះ​ទេ។ តើអ្នកចង់ឆ្លងព្រំដែនឬ? នេះមាន​ន័យ​ថា ​អ្នក​ចង់ឲ្យ​អ៊ុយក្រែនចប់ ​ព្រោះ​អ្នក​បាន​ឆ្លង​ព្រំដែន”។

ការអត្ថាធិប្បាយរបស់គាត់បានកើតមានឡើង ចំពេលសារព័ត៌មានលោកខាងលិចមួយចំនួនបានចង្អុលទៅយុទ្ធសាស្ត្រកៀរគរដ៏គឃ្លើនរបស់រដ្ឋាភិបាលទីក្រុងកៀវ។

របាយការណ៍មួយនៅក្នុងកាសែត The Economist កាលពីថ្ងៃអាទិត្យ បានសំដៅទៅលើករណីរបស់បុរសម្នាក់ដែលពិការដៃទាំងសងខាង តាំងពីកុមារភាព ប៉ុន្តែការិយាល័យកែនទាហាននៅទីក្រុង Lviv អះអាងថា​ គាត់សមនឹងបម្រើការឲ្យកងទ័ព។

បន្ទាប់ពីជម្លោះនៅ Donbass កើនឡើងខ្លាំងកាលពីឆ្នាំមុន លោក Zelensky បានដាក់ចេញនូវច្បាប់អាជ្ញាសឹក និងហាមឃាត់បុរសជនជាតិអ៊ុយក្រែនដែលមានអាយុពី ១៨ ដល់ ៦០ឆ្នាំមិនឲ្យចាកចេញពីប្រទេស។ ចាប់តាំងពីពេលនោះមក មានការកែនទាហានជាច្រើនលើកច្រើនសា ខណៈទីក្រុងកៀវ ព្យាយាមកសាងឡើងវិញនូវអង្គភាព ដែលត្រូវបានបំបែកនៅក្នុងការប្រយុទ្ធ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ អាមេរិក ព្រមានហើយព្រមានទៀត កុំឲ្យចិន ផ្តល់សព្វាវុធសាហាវ ទៅ រុស្ស៊ី