​វៀតណាម រកឃើញគ្រាប់បែកសល់ពីសម័យសង្គ្រាម ទម្ងន់ ១៥០ គីឡូក្រាម

ទីបញ្ជាការយោធាក្នុងខេត្ត Tra Vinh ដែលមានទីតាំងនៅតំបន់ដីសណ្ដទន្លេមេគង្គរបស់វៀតណាម បានយកចេញ​គ្រាប់បែកសល់ពីសម័យសង្គ្រាម​ទម្ងន់ ១៥០ គីឡូក្រាម ដែលត្រូវបានរកឃើញដោយអ្នកស្រុកនៅ​ការដ្ឋាន​សំណង់​មួយកន្លែង​ក្នុង​ឃុំ Truong Long Hoa ស្រុក Duyen Hai ។

គ្រាប់បែកនេះត្រូវបានគេកំណត់អត្តសញ្ញាណថាជា គ្រាប់បែក​ទម្លាក់​ពីលើ​យន្តហោះ Mark 81 ឬ Mk 81 មានទម្ងន់ ១៥០ គីឡូក្រាម ហើយវាត្រូវបានកប់ជ្រៅក្នុងដីអស់ពេលជាយូរមកហើយ ប៉ុន្តែវានៅតែអាចផ្ទុះបាន ។

បន្ទាប់ពីទទួលបានសេចក្តីរាយការណ៍ពីប្រជាពលរដ្ឋមូលដ្ឋាន, បញ្ជាការដ្ឋានកងរាជអាវុធហត្ថខេត្ត បានបញ្ជូនអង្គភាពជំនាញចុះពិនិត្យស្ថានភាព និងដាក់ស្លាកសញ្ញាព្រមាន ខណៈគ្រាប់​បែក​ ត្រូវ​​ដឹក​ទៅ​កន្លែង​កម្ទេចចោលតាមស្ដង់ដារ​ក្នុង​ស្រុក Tieu Can ។

ក្រោយសង្រ្គាមចប់ វៀតណាមបន្សល់ទុកគ្រាប់បែក មីន និងយុទ្ធភណ្ឌមិនទាន់ផ្ទុះ (UXO) ជាច្រើនម៉ឺនគ្រាប់ ខណៈយោងតាមមជ្ឈមណ្ឌលសកម្មភាពកម្ចាត់មីនជាតិវៀតណាម ប៉ាន់ប្រមាណថា UXO ចន្លោះពី ៦០ ម៉ឺនទៅ ៨០ ម៉ឺនតោនកំពុងស្ថិតនៅក្រោមដី ៕

ប្រែសម្រួលដោយ ៖ នាង រតនៈ

ប្រភព ៖ Tuoi Tre

ចុចអាន ៖ ករណីឃាតកម្មពុះច្រៀកសាកសពតារាហុងកុង ពេលនេះប៉ូលិសចាប់បានជនសង្ស័យម្នាក់ទៀត