ចិន ជំរុញឲ្យ WHO ទៅស៊ើបរកប្រភពដើម កូវីដ នៅ អាមេរិក វិញម្តង

ប្រទេសចិន បានជំរុញឲ្យអង្គការសុខភាពពិភពលោក (WHO) បើកការស៊ើបអង្កេតថ្មីមួយ រកប្រភពដើមនៃវីរុសកូវីដ១៩នៅសហរដ្ឋអាមេរិក ហើយទីក្រុងប៉េកាំង បានច្រានចោលការចោទប្រកាន់របស់ទីក្រុងវ៉ាស៊ីនតោនដែលថា មេរោគដ៏កាចសាហាវនេះ គឺធ្លាយចេញពីមន្ទីរពិសោធន៍មេរោគក្នុងទីក្រុង អ៊ូហាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅពេលសួរអំពីការអត្ថាធិប្បាយថ្មីៗរបស់ប្រធាន WHO លោក Tedros Adhanom Ghebreyesus ដែលអំពាវនាវឲ្យប្រទេសចិន និងប្រជាជាតិដទៃទៀតមានតម្លាភាពក្នុងការចែករំលែកទិន្នន័យទាក់ទងនឹងប្រភពដើមនៃវិបត្តិសុខភាពនេះ, អ្នកនាំពាក្យក្រសួងការបរទេសចិន លោកស្រី Mao Ning ទទូចថា ទីក្រុងប៉េកាំងបានចែករំលែកទិន្នន័យ និងការស្រាវជ្រាវរកឃើញ ច្រើនជាងប្រទេសណាៗទាំងអស់ ហើយបានចូលរួមចំណែកច្រើនបំផុតលើការតាមដានរកប្រភពដើម។

លោកស្រីបានប្រាប់អ្នកយកព័ត៌មានកាលពីថ្ងៃចន្ទទី០៦ខែមីនាថា “ការតាមរកប្រភពដើមនៃមេរោគ គឺជាបញ្ហាវិទ្យាសាស្ត្រ។ ការសិក្សាគួរតែឬត្រូវធ្វើឡើងរួមគ្នា ដោយអ្នកវិទ្យាសាស្ត្រជុំវិញពិភពលោកតែប៉ុណ្ណោះ ប៉ុន្តែរដ្ឋាភិបាលសហរដ្ឋអាមេរិក បានរារាំងកិច្ចខិតខំប្រឹងប្រែងទាំងនោះដោយយកបញ្ហានេះ ធ្វើជារឿងនយោបាយ អាវុធ និងឧបករណ៍”។

គួរបញ្ជាកថា ការកត់សម្គាល់របស់លោកស្រី Mao បានកើតឡើងប៉ុន្មានថ្ងៃ បន្ទាប់ពីនាយក FBI លោក Christopher Wray អះអាងថា មេរោគនេះ “ទំនងបំផុត” គឺមានប្រភពចេញពីការលេចធ្លាយពីមន្ទីរពិសោធន៍ចិន។

ចំណែកនាយកដ្ឋានថាមពលអាមេរិក ក៏ត្រូវបានគេរាយការណ៍ថា ផ្លាស់ប្តូរជំហររបស់ខ្លួនលើបញ្ហានេះផងដែរ ដោយថ្មីៗបានគាំទ្រទ្រឹស្តីនៃការលេចធ្លាយចេញពីមន្ទីរពិសោធន៍ ថ្វីបើមាន “ទំនុកចិត្តទាប” ក៏ដោយ៕

ប្រែសម្រួល៖ Vann Vann

ប្រភព៖ RT

ចុចអាន៖ FBI ចេញមុខអះអាងថា វីរុសកូវីដ១៩ ទំនងធ្លាយចេញពីមន្ទីរពិសោធន៍ចិន