ទីបំផុត រុស្ស៊ី បាញ់មីស៊ីលល្បឿនលឿនជាងសំឡេងដ៏កម្រ ស្រោចលើអ៊ុយក្រែន

មនុស្សយ៉ាងតិច៩នាក់ត្រូវស្លាប់ នៅក្នុងរលកថ្មីនៃការវាយប្រហារទូទាំងប្រទេសអ៊ុយក្រែន ដែលរុស្ស៊ីបានប្រើប្រាស់អាវុធដ៏មានអានុភាព រួមទាំងមីស៊ីលល្បឿនលឿនជាងសំឡេងដ៏កម្រផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍ រុស្ស៊ី​​មិនដែល​បាញ់​មីស៊ីលល្បឿន​លឿនជាងសំឡេង Kinzhal មានសមត្ថភាព​គេច​ផុតខែល​ការពារ​ដែន​អាកាស​ទេ ចាប់​តាំង​ពី​​ជម្លោះផ្ទុះឡើង។

ការបាញ់មីស៊ីលស្រោចលើកចុងក្រោយបង្អស់នេះ គឺជាការវាយប្រហារធ្ងន់ធ្ងរបំផុតលើប្រទេសអ៊ុយក្រែន មិនធ្លាប់សោះនារយៈពេលប៉ុន្មានសប្តាហ៍ចុងក្រោយ។

ការវាយប្រហារនេះ ក៏បានកាត់ផ្តាច់ថាមពលដល់រោងចក្រនុយក្លេអ៊ែរ Zaporizhzhia ដែលជារោងចក្រធំបំផុតរបស់អឺរ៉ុបផងដែរ។

កាលពីថ្ងៃព្រហស្បតិ៍ទី០៩ខែមីនា អ្នកនាំពាក្យក្រសួងការពារជាតិរុស្ស៊ី លោក Igor Konashenkov បាននិយាយថា “អាវុធរយៈចម្ងាយឆ្ងាយតាមផ្លូវអាកាស សមុទ្រ និងដីគោក រួមទាំងប្រព័ន្ធមីស៊ីលល្បឿនលឿន Kinzhal ផងដែរបានវាយប្រហារហេដ្ឋារចនាសម្ព័ន្ធយោធាសំខាន់ៗរបស់អ៊ុយក្រែន”។

យ៉ាងណាមិញ យោធា​អ៊ុយក្រែន​​អះអាង​ថា ខ្លួន​បាន​បាញ់​ទម្លាក់ដោយ​ជោគជ័យនូវមីស៊ីល​ផ្លោង​ចំនួន៣៤គ្រាប់ និង​យន្តហោះ​គ្មាន​មនុស្ស​បើក Shahed ផលិត​ដោយ​អ៊ីរ៉ង់ចំនួន៤គ្រឿង។

ប៉ុន្តែអ៊ុយក្រែនក៏បាននិយាយដែរថា ខ្លួនមិនអាចស្ទាក់ចាប់មីស៊ីលល្បឿនលឿនជាងសំឡេង Kinzhal ចំនួន៦គ្រាប់បានទេ ហើយក៏មិនអាចបំផ្លាញអាវុធស៊េរីចាស់ជាងនេះ ដូចជាមីស៊ីលប្រឆាំងនាវា Kh-22 និងមីស៊ីលប្រឆាំងយន្តហោះ S-300 បានដែរ៕

ប្រែសម្រួល៖ Vann Vann

ប្រភព៖ BBC

ចុចអាន៖ ប្រមុខណាតូ ព្រមានថា ទីក្រុង Bakhmut នឹងធ្លាក់ក្នុងដៃរុស្ស៊ី ត្រឹមប៉ុន្មានថ្ងៃទៀតប៉ុណ្ណោះ