ប្រព័ន្ធផ្សព្វផ្សាយរដ្ឋបានរាយការណ៍កាលពីថ្ងៃសុក្រទី១០ខែមីនាថា កម្មករនៅការដ្ឋានសំណង់ផ្ទះល្វែងមួយក្នុងរដ្ឋធានីព្យុងយ៉ាងរបស់កូរ៉េខាងជើង បានរកឃើញគ្រាប់បែក គ្រាប់ផ្លោង គ្រាប់មីន និងគ្រឿងផ្ទុះផ្សេងទៀតចំនួន១១០គ្រាប់ ដែលខ្លួននិយាយថា ជាអាវុធផលិតដោយសហរដ្ឋអាមេរិកសល់ពីសង្គ្រាមកូរ៉េ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទីភ្នាក់ងារសារព័ត៌មានរដ្ឋ KCNA, គ្រាប់ទាំងនេះ ត្រូវបានរកឃើញ និងដោះដោយអ្នកជំនាញ ជាមួយការិយាល័យសន្តិសុខសាធារណៈទីក្រុងព្យុងយ៉ាង។

របាយ​ការណ៍​​និយាយ​ថា​ “​គ្រឿង​ផ្ទុះ​ដែល​រក​ឃើញ​នៅ​ការដ្ឋាន​សំណង់ ​ក្នុង​តំបន់ Hwasong គឺ​មាន​ច្រែះ ប៉ុន្តែ​មាន​ហានិភ័យ​អាច​ផ្ទុះ​បាន​គ្រប់​ពេល”។

មេដឹកនាំគីម ជុងអ៊ុន បានចាប់ផ្តើមគម្រោងសាងសង់ផ្ទះល្វែងថ្មីចំនួន៥០០០០ នៅក្នុងទីក្រុងព្យុងយ៉ាង ដែលជាផ្នែកមួយនៃការជំរុញលើកកម្ពស់ជីវភាពនៅក្នុងប្រទេសក្រីក្រមួយនេះ។

សេដ្ឋកិច្ចរបស់កូរ៉េខាងជើង ត្រូវជួបបញ្ហាដោយការបិទព្រំដែនដើម្បីទប់ស្កាត់ជំងឺកូវីដ១៩ គ្រោះមហន្តរាយធម្មជាតិ និងទណ្ឌកម្មអន្តរជាតិចំពោះកម្មវិធីអាវុធនុយក្លេអ៊ែរ និងមីស៊ីលផ្លោងរបស់ខ្លួន ដែលសហរដ្ឋអាមេរិកនិយាយថា ទាញយកធនធានមានកម្រិត ចេញពីការបំពេញតម្រូវការរបស់មនុស្ស។

គ្រឿងផ្ទុះដែលនៅសេសសល់ពីសង្គ្រាមកូរ៉េឆ្នាំ ១៩៥០ ដល់ឆ្នាំ ១៩៥៣ បានបង្កគ្រោះថ្នាក់ដល់ពលរដ្ឋក្នុងប្រទេសកូរ៉េទាំងពីរជាយូរមកហើយ។ ក្នុងរយៈពេលប៉ុន្មានឆ្នាំកន្លងមកនេះ អ្នកជំនាញមកពីគណៈកម្មាធិការអន្តរជាតិនៃអង្គភាពប្រឆាំងអាវុធរបស់កាកបាទក្រហម បានបណ្តុះបណ្តាលក្រុមកូរ៉េខាងជើងក្នុងការដោះគ្រាប់បែក។

ក្នុងអំឡុងសង្គ្រាមកូរ៉េ យន្តហោះចម្បាំងរបស់អាមេរិក បានវាយប្រហារលើទឹកដីដ៏ធំធេងរបស់ប្រទេសនេះ ដោយអាមេរិក បានទម្លាក់គ្រាប់បែកលើកូរ៉េខាងជើង ច្រើនជាងការទម្លាក់ក្នុងតំបន់ប៉ាស៊ីហ្វិកទាំងមូលទៅទៀត អំឡុងសង្គ្រាមលោកលើកទី២៕

ប្រែសម្រួល៖ Vann Vann

ប្រភព៖​ CNA

ចុចអាន៖ កូរ៉េខាងជើងព្រមាន! សង្គ្រាមនុយក្លេអ៊ែរមែនទែន ជិតផ្ទុះឡើងហើយ