បើតាមរដ្ឋមន្ត្រីស្ដីទីនៃក្រសួងការពារជាតិដាណឺម៉ាកលោក Troels Lund Poulsen បានឲ្យដឹងកាលពីពេលថ្មីៗនេះថា រថក្រោះខ្លារខិន Leopard 1 ជើងដំបូងមកពីប្រទេសដាណឺម៉ាក អាល្លឺម៉ង់ និងហូឡង់ នឹងត្រូវប្រគល់ឲ្យដល់ដៃអ៊ុយក្រែននៅដើមខែឧសភាខាងមុខនេះ ។

លោក Poulsen បានប្រាប់ទូរទស្សន៍របស់ដាណឺម៉ាកថា “យើងអាចនឹងបញ្ជូនរថក្រោះខ្លារខិនធុន Leopard 1 ពី ៨០ ទៅ ៩០ គ្រឿង ក្នុងអំឡុងដើមខែឧសភា ដល់ដំណាច់ឆ្នាំ ២០២៣ នេះ ហើយយើងនឹងចែកចាយជាបន្តបន្ទាប់ទៀត ព្រោះវាចាំបាច់ដើម្បីពន្លឿនដល់សកម្មភាពហ្វឹកហ្វឺនជាមួយទាហានអ៊ុយក្រែន” ។

ស្របពេលជាមួយគ្នានេះ ប្រទេសលោកខាងលិចក៏បាននឹងកំពុងផ្គត់ផ្គង់ដល់អ៊ុយក្រែន នូវប្រព័ន្ធសព្វាវុធជាច្រើនប្រភេទ រួមទាំងប្រព័ន្ធខែលមីស៊ីលការពារដែនអាកាស ប្រព័ន្ធបាញ់រ៉ុកកែត រថក្រោះ កាំភ្លើងធំ និងកាំភ្លើងប្រឆាំងយន្តហោះ ចាប់តាំងពីផ្ទុះប្រតិបត្តិការសឹករបស់រុស្ស៊ីក្នុងខែកុម្ភៈ ឆ្នាំ២០២២ ។

ទន្ទឹមនោះ កាលពីចុងខែមករា ប្រទេសអាឡឺម៉ង់បានប្តេជ្ញាបញ្ជូនរថក្រោះខ្លារខិន Leopard 2A6 ចំនួន ១៤ គ្រឿងទៅកាន់ទីក្រុងកៀវ ខណៈរដ្ឋផ្សេងទៀតក៏បានប្រកាសពីជំហានស្រដៀងគ្នា ឬសន្យាថា នឹងចូលរួមក្នុងគំនិតផ្តួចផ្តើមនេះផងដែរ ។

ពាក់ព័ន្ធនឹងបញ្ហានេះដែរ ទីក្រុងមូស្គូក៏បានព្រមានជាបន្តបន្ទាប់ផងដែរថា ការបញ្ជូនជំនួយដ៍សាហាវៗបន្ថែមទៀតទៅកាន់ទីក្រុងកៀវ ប្រឈមនឹងហានិភ័យដែលធ្វើឲ្យជម្លោះកាន់តែរីកធំឡើង ជាពិសេសគឺការប្រឈមមុខដាក់គ្នាដោយផ្ទាល់រវាងអង្គការណាតូ និងរុស្ស៊ី ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ មេទាហានស៊ីឈ្នួល រុស្ស៊ី ប្រាប់ស្ថានភាពក្នុងសមរភូមិនៅទីក្រុង Bakhmut