ប្រធានាធិបតីអ៊ុយក្រែនលោក Volodymyr Zelensky បាននិយាយថា អនាគតរបស់ប្រទេសអ៊ុយក្រែនកំពុងត្រូវបានសម្រេចក្នុងសមរភូមិប្រយុទ្ធនៅទីក្រុង Bakhmut, ទីក្រុង Vuhledar និងកន្លែងផ្សេងទៀត ។

ទន្ទឹមនោះលោក Zelensky ក៏បានលើកទឹកចិត្តដល់កងទ័ពជួរមុខរបស់លោក ដែលកំពុងឈរជើងប្រយុទ្ធនៅភាគខាងកើតរបស់ប្រទេសផងដែរ ដោយលោកបាននិយាយថា រាល់ការប្រយុទ្ធទាំងអស់ គឺដើម្បីអនាគតរបស់ជាតិមាតុភូមិអ៊ុយក្រែន ។

លោកប្រធានាធិបតីបាននិយាយនៅក្នុងសារជាវីដេអូមួយ ដែលបានចេញផ្សាយកាលពីថ្ងៃអង្គារថា “យើងពិតជាមានការឈឺចាប់ខ្លាំងណាស់ បន្ទាប់ពីឃើញទីក្រុងរ៉ែអំបិលរបស់យើងមួយនេះ ស្ថិតនៅក្នុងស្ថានភាពតឹងតែង និងស្វិតស្វាញបែបនេះ” ។

រហូតមកដល់ពេលនេះ ការ​ប្រយុទ្ធ​គ្នា​យ៉ាង​ខ្លាំង​ក្លានៅ​តែ​បន្ត​កើតមាន រវាង​កង​កម្លាំង​រុស្ស៊ី និង​អ៊ុយក្រែន​សម្រាប់​ការ​គ្រប់​គ្រង​បន្ទាយ Bakhmut ​ក្នុង​តំបន់ Donetsk ភាគ​ខាង​កើត​របស់​អ៊ុយក្រែន ។

គួរបញ្ជាក់ថា ជ័យជម្នះនៅទីក្រុង Bakhmut ដែលមានប្រជាជនមុនសង្រ្គាមប្រហែល ៧ ម៉ឺននាក់នឹងផ្តល់ឲ្យរុស្ស៊ីនូវរង្វាន់ធំទីមួយនៃការវាយលុករដូវរងា បន្ទាប់ពីបានកែនទាហានបម្រុងរាប់សែននាក់កាលពីឆ្នាំមុន ហើយវាក៏នឹងក្លាយជាជំហានមួយទៀតដើម្បីដណ្តើមយកតំបន់ Donbas ដែលជាគោលដៅសង្គ្រាមដ៏សំខាន់របស់រុស្ស៊ីផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ២ ខែទៀត រថក្រោះខ្លារខិន Leopard 1 ពី ៨០ ទៅ ៩០ គ្រឿងនឹងទៅដល់ដៃ អ៊ុយក្រែន