កាលពីថ្ងៃសៅរ៍ទី១៨ខែមីនា តុលាការឧក្រិដ្ឋកម្មអន្តរជាតិ (ICC) បានចេញដីកាចាប់ខ្លួនលោក វ្ល៉ាឌីមៀរ ពូទីន ចំពេលមានការចោទប្រកាន់ពីបទឧក្រិដ្ឋកម្មសង្រ្គាម អំឡុងការលុកលុយរបស់លោកលើប្រទេសអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Karim Khan ដែលជាប្រធានរដ្ឋអាជ្ញារបស់ ICC បាននិយាយថា កុមាររាប់រយនាក់ត្រូវបាននាំយកដោយខុសច្បាប់ ចេញពីមណ្ឌលកុមារកំព្រា និងផ្ទះកុមារ ក្នុងតំបន់កាន់កាប់នៅអ៊ុយក្រែន ហើយត្រូវបានដឹកជញ្ជូនទៅកាន់ប្រទេសរុស្ស៊ី ដើម្បីប្រគល់ជូនគ្រួសារថ្មី។

លើលោកនេះ លោក ពូទីន បានក្លាយជាប្រធានាធិបតីទី៣ហើយ ដែល ICC ចេញដីកាចាប់ខ្លួនបន្ទាប់ពីលោក Omar al-Bashir របស់ប្រទេសស៊ូដង់ និងលោក Muammar Gaddafi របស់ប្រទេសលីប៊ី ហើយលោក ពូទីន គឺជាមេដឹកនាំដំបូងគេបង្អស់ ក្នុងចំណោមសមាជិកអចិន្ត្រៃយ៍ទាំងប្រាំនៃក្រុមប្រឹក្សាសន្តិសុខអង្គការសហប្រជាជាតិ ដែល ICC ចេញដីកាចាប់ខ្លួន។

ឥឡូវនេះ ដីការបស់ ICC តម្រូវឲ្យរដ្ឋជាសមាជិកចំនួន១២៣របស់ខ្លួន ចាប់ខ្លួនប្រធានាធិបតីរុស្ស៊ី ហើយបញ្ជូនគាត់ទៅទីក្រុងឡាអេ ដើម្បីកាត់ទោស ប្រសិនបើគាត់ជាន់ដីរបស់ពួកគេ។

ទោះបីជាយ៉ាងណាក៏ដោយ វិមានក្រឹមឡាំង បានថ្កោលទោសសេចក្តីសម្រេចរបស់ ICC ថា មិនអាចទទួលយកបាន ហើយអះអាងថា​ ការសម្រេចចិត្តណាមួយរបស់ ICC ទាក់ទងនឹងប្រទេសរុស្ស៊ីគឺត្រូវទុកជាមោឃៈ ព្រោះទីក្រុងមូស្គូ មិនទទួលស្គាល់យុត្តាធិការរបស់តុលាការនេះទេ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ លោក ពូទីន ធ្វើទស្សនកិច្ចតំបន់គ្រីមៀ ទាំងមិនប្រកាសឲ្យដឹងមុន បន្ទាប់ពី ICC ចេញដីកាចាប់ខ្លួន