រុស្ស៊ីប្រាប់ ចៅក្រម ICC ឲ្យឧស្សាហ៍មើលមេឃផង ប្រយ័ត្នអាវុធនុយក្លេអ៊ែរ ធ្លាក់លើ! (មានវីដេអូ)

កាលពីថ្ងៃចន្ទទី២០ខែមីនា អតីតប្រធានាធិបតីរុស្ស៊ី បានគំរាមវាយប្រហារទីក្រុងឡាអេ ជាមួយអាវុធនុយក្លេអ៊ែរល្បឿនលឿនជាងសំឡេង បន្ទាប់ពីតុលាការឧក្រិដ្ឋកម្មអន្តរជាតិ (ICC) ចេញដីកាចាប់ខ្លួនលោក វ្ល៉ាឌីមៀរ ពូទីន ជុំវិញឧក្រិដ្ឋកម្មសង្រ្គាមនៅអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Dmitry Medvedev បានព្រមានចៅក្រមរបស់ ICC ឲ្យឧស្សាហ៍មើលមេឃដោយប្រយ័ត្នប្រយែងផង។ គាត់បានគំរាមកំហែងថា នឹងបាញ់មីស៊ីលល្បឿនលឿនជាងសំឡេងប្រភេទ Onyx ចេញពីរុស្ស៊ីទៅលើតុលាការនេះ។

កាលពីថ្ងៃសុក្រ ICC បានអំពាវនាវឲ្យចាប់ខ្លួនលោកពូទីន និងចោទប្រកាន់មេដឹកនាំរុស្សីរូបនេះពីបទប្រព្រឹត្តឧក្រិដ្ឋកម្មសង្រ្គាម ដោយចាប់ពង្រត់កុមារអ៊ុយក្រែន ចេញពីផ្ទះរបស់ពួកគេ និងនិរទេសទៅកាន់ប្រទេសរុស្ស៊ី។

លោក Medvedev បានព្រមានថា ការសម្រេចចិត្តរបស់ ICC នឹងមានផលវិបាកធំធេង សម្រាប់សង្គ្រាមអន្តរជាតិ។ គាត់និយាយថា “មនុស្សគ្រប់គ្នាដើរនៅក្រោមព្រះ និងមីស៊ីល។ អ្នកអាចស្រមៃបានយ៉ាងច្បាស់អំពីការប្រើប្រាស់មីស៊ីល Onyx ដែលមានល្បឿនលឿនជាងសំឡេងបាញ់ពីសមុទ្រខាងជើង ដោយនាវារុស្ស៊ីលើតុលាការទីក្រុងឡាអេ”។

លោក​​បន្ត​ថា “​គេមិនអាចបាញ់មីស៊ីល​នេះទម្លាក់បាន​ទេ​ ហើយតុលាការគ្រាន់តែជាអង្គការអន្តរជាតិដ៏កំសត់មួយប៉ុណ្ណោះ មិនមែនជាប្រជាជននៃប្រទេសណាតូទេ។ ដូច្នេះ គេ​ក៏​មិន​ចាប់​ផ្តើម​សង្គ្រាម​ដែរ។ ចៅក្រមខ្លាច ហើយគ្មាននរណាម្នាក់នឹងសោកស្តាយទេ។ ចៅក្រមទាំងអស់ ត្រូវឧស្សាហ៍​មើល​ទៅ​មេឃ​ដោយ​ប្រយ័ត្នប្រយែង”។

លោក Medvedev ក៏ធ្លាប់បានប្រៀបធៀបដីកាចាប់ខ្លួនលោក ពូទីន ទៅនឹងក្រដាសបង្គន់ផងដែរ។

គួរបញ្ជាក់ថា លោក Medvedev គឺជាប្រធានាធិបតីចន្លោះឆ្នាំ ២០០៨ ដល់ ២០១២ ហើយបច្ចុប្បន្នគាត់គឺជាអនុប្រធានក្រុមប្រឹក្សាសន្តិសុខរបស់រុស្ស៊ី៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ មកដឹងប្រទេសមួយចំនួន ដែលមិនអាចចាប់ខ្លួនលោក ពូទីន បាន ទោះ ICC ចេញដីកា