ព័ត៌មានអន្ដរជាតិ

រុស្ស៊ី ដាក់លក្ខខណ្ឌ ១០ចំណុច បើអ៊ុយក្រែន ធ្វើបាន នោះនឹងមានសន្តិភាព

បានផុស

២ years មុន

នៅ

ថ្ងៃព្រហស្បតិ៍ ៣០ មីនា ២០២៣

ដោយ

អនុរដ្ឋមន្ត្រីការបរទេសរុស្ស៊ី លោក Mikhail Galuzin បានបង្ហាញលក្ខខណ្ឌ ១០ ចំណុចដល់រដ្ឋាភិបាលក្រុងកៀវ បើសិនជាចង់បញ្ឈប់អរិភាព ។ នៅក្នុងបទសម្ភាសមួយកាលពីថ្ងៃពុធទី២៩ ខែមីនា លោក Galuzin និយាយថា អនាគតរបស់អ៊ុយក្រែន នឹងអាស្រ័យទៅលើថាតើទីក្រុងកៀវ និងក្រុមអ្នកគាំទ្រលោកខាងលិច នឹងទទួលស្គាល់ការពិតបានឆាប់កម្រិតណា ។

អនុរដ្ឋមន្ត្រីការបរទេសរុស្សី លោក Mikhail Galuzin (រូបថត៖ TASS)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Galuzin ប្រាប់សារព័ត៌មាន RTVI ថា ដើម្បីឲ្យអ៊ុយក្រែនទទួលបានសន្តិភាព កងកម្លាំងយោធារបស់ទីក្រុងកៀវ ត្រូវតែចុះចាញ់ ហើយលោកខាងលិច ត្រូវតែបញ្ឈប់រាល់ការដឹកជញ្ជូនសព្វាវុធទៅកាន់ទីក្រុងកៀវ ។

លក្ខខណ្ឌមួយចំនួនទៀតដែលលោកបានដាក់ ចាប់តាំងពីអរិភាពកើនឡើងខ្លាំងក្នុងខែកុម្ភៈ ឆ្នាំ២០២២ មានដូចជា ភាពគ្មានយោធា និងលុបបំបាត់លទ្ធិណាស៊ីនិយមរបស់អ៊ុយក្រែន, ការប្តេជ្ញាចិត្តមិនចូលរួមជាមួយសហភាពអឺរ៉ុប ឬអង្គការណាតូ និងការបញ្ជាក់អំពីស្ថានភាពមិនមែនរដ្ឋនុយក្លេអ៊ែររបស់ទីក្រុងកៀវ ។

លក្ខខណ្ឌមួយទៀតត្រូវបានដាក់បន្ថែមនៅក្នុងខែតុលា ឆ្នាំ២០២២ នោះគឺពាក់ព័ន្ធនឹងការទទួលស្គាល់ដែនដីថ្មីរបស់រុស្ស៊ីដូចជា Kherson, Zaporozhye, Donetsk និង Lugansk ។

ការធានាបាននូវការការពារភាសារុស្សី និងសិទ្ធិរបស់ពលរដ្ឋដែលនិយាយភាសារុស្សី ក៏ដូចជាក្រុមជនជាតិផ្សេងទៀតទាំងអស់នៅក្នុងប្រទេសអ៊ុយក្រែន ក៏ស្ថិតក្នុងលក្ខខណ្ឌទាំង ១០ ចំណុចរបស់លោក Galuzin ផងដែរ ។ ជាងនេះទៅទៀត លោកនិយាយថា អ៊ុយក្រែនចាំបាច់ត្រូវបើកព្រំដែនជាមួយរុស្ស៊ីសាជាថ្មី និងស្តារឡើងវិញនូវក្របខ័ណ្ឌច្បាប់នៃទំនាក់ទំនងជាមួយទីក្រុងមូស្គូ និងអតីតសាធារណរដ្ឋសូវៀតផ្សេងទៀត ដែលខ្លួនបានបោះបង់ចោល ក្រោយរដ្ឋប្រហារគាំទ្រដោយសហរដ្ឋអាមេរិកកាលពីឆ្នាំ ២០១៤។

ជាលើកដំបូង ទីក្រុងមូស្គូបានទាមទារឲ្យដកទណ្ឌកម្មប្រឆាំងរុស្ស៊ីទាំងអស់ និងបញ្ចប់ការកាត់ទោសប្រឆាំងនឹងរុស្ស៊ី បុគ្គល និងស្ថាប័នស្របច្បាប់របស់ខ្លួន រួមទាំងដកដីការបស់តុលាការឧក្រិដ្ឋកម្មអន្តរជាតិ (ICC) នាពេលថ្មីៗនេះ សម្រាប់លោកប្រធានាធិបតី វ្ល៉ាឌីមៀរ ពូទីន និងស្នងការសិទ្ធិកុមារលោកស្រី Maria Lvova-Belova ផងដែរ ។

លក្ខខណ្ឌចុងក្រោយរបស់លោក Galuzin គឺឲ្យប្រទេសលោកខាងលិច ចំណាយសម្រាប់ការកសាងឡើងវិញនូវហេដ្ឋារចនាសម្ព័ន្ធស៊ីវិលដែលត្រូវបានបំផ្លាញដោយយោធាអ៊ុយក្រែនចាប់តាំងពីឆ្នាំ ២០១៤ មក ៕

ប្រែសម្រួល៖ Vann Vann

ប្រភព៖ RT

ចុចអាន៖ អាមេរិក ប្រកាសឈប់ដោះដូរ ទិន្នន័យ នុយក្លេអ៊ែរ ជាមួយ រុស្ស៊ី