បេក្ខជនតំណាងរាស្រ្តថៃ យកស្តេចពស់វែក ចូលមណ្ឌលចុះឈ្មោះបោះឆ្នោត ធ្វើឲ្យផ្អើលគេឯង

គណៈកម្មាធិការរៀបចំការបោះឆ្នោតរបស់ប្រទេសថៃ បានប្រាប់ឲ្យបេក្ខជនតំណាងរាស្រ្តគណបក្ស Palang Pracharath (PPP) ចេញពីសាលាខេត្ត ខនកែន ភាគឦសានប្រទេសថៃ នៅពេលគាត់យកស្តេចពស់វែក ពាក់លើស្មាដើរចូលសាលដែលមានមនុស្សកកកុញ អំឡុងពេលព្រឹត្តិការណ៍ចុះឈ្មោះ កាលពីថ្ងៃចន្ទទី០៣ខែមេសា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅវេលាម៉ោង ៨ និង៣០នាទីព្រឹក បេក្ខជនតំណាងរាស្រ្តមកពីគណបក្សនយោបាយចំនួន១១ នៃស្រុកទាំង១១ របស់ខេត្តខនកែន បានធ្វើដំណើរទៅកាន់មណ្ឌលចុះឈ្មោះក្នុងសាលាខេត្ត ដើម្បីឲ្យគណៈកម្មាធិការរៀបចំការបោះឆ្នោតពិនិត្យឯកសារ និងចាប់លេខរៀង ក្នុងការបោះឆ្នោតនាពេលខាងមុខ។

លោក Panya Sripanya បេក្ខជនសមាជិកសភាបក្ស PPP តំណាងឲ្យមណ្ឌលទី៣ បាននាំយកពស់វែក២ក្បាល និងពស់ថ្លាន់៣ក្បាល ចូលទៅកាន់ព្រឹត្តិការណ៍ដ៏មមាញឹកនោះ។

នៅពេលបេក្ខជនតំណាងរាស្រ្តរូបនេះ ដើរចូលទៅក្នុងសាលាខេត្តទាំងដែលមានពស់វែកមួយក្បាលរុំជុំវិញករបស់គាត់ អ្នកចូលរួមជាង ១ពាន់នាក់ ស្រាប់តែនាំគ្នាស្រែកឡើងផ្អើលតែម្តង។

ភ្លាមៗនោះ គណៈកម្មាធិការរៀបចំការបោះឆ្នោតបានណែនាំឲ្យលោក Panya យកសត្វពស់ទាំងអស់ចេញពីអគារ ដោយខ្លាចថា វានឹងចឹកគេឯង ឬបង្កភាពចលាចល។

បើសិនជាត្រូវពស់វែកចឹក មនុស្សនឹងមានហានិភ័យគ្រោះថ្នាក់ដល់ជីវិត ចំណែកឯពស់ថ្លាន់ ថ្វីបើវាគ្មានពិសក៏ពិតមែន ប៉ុន្តែវាក៏អាចបង្កគ្រោះថ្នាក់បានដែរ។

យ៉ាងណាក្តី គេមិនទាន់ដឹងថាតើ ហេតុអ្វីបានជាបេក្ខជនតំណាងរាស្រ្តរូបនេះ យកសត្វពស់ចូលទៅក្នុងសាលាខេត្ត៕

ប្រែសម្រួល៖ Vann Vann

ប្រភព៖ Thaiger

ចុចអាន៖ ប៉ូលិសថៃ ទូទាំងប្រទេស ត្រៀមខ្លួនទប់ទល់នឹងអំពើហិង្សា អំឡុងយុទ្ធនាការឃោសនាបោះឆ្នោត