វៀតណាម នឹងស៊ើបអង្កេតប្រតិបត្តិការរបស់ TikTok នៅក្នុងប្រទេស​

រដ្ឋាភិបាលវៀតណាមនឹងបើកស៊ើបអង្កេតលើប្រតិបត្តិការរបស់ TikTok ក្នុងប្រទេសនៅខែក្រោយនេះ ដើម្បីធានាថា វេទិកាវីដេអូនេះ អនុលោមតាមបទប្បញ្ញត្តិស្តីពីការគ្រប់គ្រងមាតិកា ការបង់ពន្ធ និងគោលនយោបាយពាណិជ្ជកម្មជាដើម ។

វៀតណាមបង្ហាញថា កម្មវិធីចិនដ៏ពេញនិយមមួយនេះបានអនុញ្ញាតឲ្យមានខ្លឹមសារបំពុល ប្រមាថ មិនពិត និងអបិយជំនឿជាច្រើន​នៅលើវេទិការបស់ខ្លួន ។ ដូចគ្នានេះ Facebook និង YouTube ជាដើម ប្រសិនបើចូលដំណើរការដល់ក្នុងវៀតណាមហើយ​ ត្រូវតែគោរពតាមច្បាប់បទបញ្ញត្តិ និងកតព្វកិច្ច​បង់ពន្ធឲ្យបានត្រឹមត្រូវ ។

បើយោងតាមទិន្នន័យរបស់ក្រុមហ៊ុនបានឲ្យដឹងថា កន្លងមក TikTok ក៏ធ្លាប់បានលុបវីដេអូចំនួន ១.៧ លានវីដេអូតាមសំណើរបស់រដ្ឋាភិបាលវៀតណាមក្នុងត្រីមាសទី ៤ នៃឆ្នាំមុន ដោយសារពួកគេត្រូវបានចាត់ទុកថា បំពានលើគោលនយោបាយរដ្ឋាភិបាល ។

ដូចគ្នានេះ ដើម្បីឆ្លើយតបនឹងរដ្ឋាភិបាល, TikTok ប្រចាំនៅវៀតណាម​ នឹងធ្វើការកែសម្រួលគោលនយោបាយរបស់ខ្លួន​ ​ឲ្យស្របតាមគោលនយោបាយវៀតណាមចង់បាន ដែលរំពឹងចូលជាធរមាន ចាប់ពីថ្ងៃ ២៤ មេសា ខាងមុខនេះ ។

គួរឲ្យដឹងថា នៅក្នុងប្រទេសវៀតណាម មានអ្នកប្រើប្រាស់ TikTok រហូតដល់ទៅ ៥០ លាននាក់ ដោយក្នុងនោះមានអាយុចាប់ពី ១៨ ឆ្នាំឡើងទៅ ៕

ប្រែសម្រួលដោយ ៖​ នាង​ រតនៈ

ប្រភព ៖ The Business Times

ចុចអាន ៖ រុស្ស៊ី ថា សមាជិកភាពណាតូរបស់ ហ្វាំងឡង់ នឹងធ្វើឲ្យអឺរ៉ុបកាន់តែវឹកវរ