រុស្ស៊ី ថា សមាជិកភាពណាតូរបស់ ហ្វាំងឡង់ នឹងធ្វើឲ្យអឺរ៉ុបកាន់តែវឹកវរ

វិមានក្រឹមឡាំងបាននិយាយកាលពីថ្ងៃព្រហស្បតិ៍ថា សមាជិកភាពរបស់ហ្វាំងឡង់នៅក្នុងអង្គការណាតូ គឺមិនពង្រឹងស្ថិរភាព និងសន្តិសុខរបស់អឺរ៉ុបនោះទេ ។

អ្នកនាំពាក្យវិមានក្រឹមឡាំង លោក Dmitry Peskov បាននិយាយក្នុងអំឡុងសន្និសីទសារព័ត៌មានមួយថា “នេះពិតជាព្រឹត្តិការណ៍មួយដែលមិនរួមចំណែកដល់ការពង្រឹងស្ថិរភាព និងសន្តិសុខនៅលើទ្វីបអឺរ៉ុបឡើយ ហើយវាក៏អាចធ្វើឲ្យអឺរ៉ុបកាន់តែមានភាពវឹកវរផងដែរ” ។

លោក Peskov ក៏បាននិយាយដែរថា “សមាជិកភាពរបស់រដ្ឋាភិបាលទីក្រុង Helsinki កំពុងបង្កើតការគំរាមកំហែងបន្ថែមសម្រាប់សហព័ន្ធរុស្ស៊ី ហើយវាតម្រូវឲ្យយើងចាត់វិធានការចាំបាច់ដើម្បីធ្វើឲ្យមានតុល្យភាពលើប្រព័ន្ធសន្តិសុខឡើងវិញផងដែរ” ។

ស្របពេលជាមួយគ្នានេះ អ្នកនាំពាក្យរូបនេះក៏បានព្រមានដែរថា ប្រទេសរុស្ស៊ីនឹងឃ្លាំមើលយ៉ាងដិតដល់រាល់សកម្មភាពដែលកើតមានឡើងនៅក្នុងប្រទេសហ្វាំងឡង់ ដោយពណ៌នាការពង្រីករបស់ណាតូនៅពេលនេះថាជា “ការរំលោភលើសន្តិសុខ និងផលប្រយោជន៍ជាតិរបស់យើង” ។

គួរបញ្ជាក់ថា ប្រទេសហ្វាំងឡង់បានចូលរួមជាផ្លូវការជាមួយអង្គការណាតូកាលពីថ្ងៃអង្គារ ខណៈដែលរដ្ឋមន្ត្រីការបរទេសលោក Pekka Haavisto បានប្រគល់សន្ធិសញ្ញាចូលជាសមាជិកដែលបានចុះហត្ថលេខារួចហើយ ទៅឲ្យរដ្ឋមន្ត្រីការបរទេសអាមេរិកលោក Antony Blinken ក្នុងអំឡុងពេលពិធីទទួលជាផ្លូវការនៅទីក្រុងព្រុចសែល ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ដឹងទេ ប្រទេសណាចូលសមាជិក អង្គការណាតូ ចុងក្រោយបង្អស់ មុន ហ្វាំងឡង់?