អាមេរិក នឹងលក់មីស៊ីលប្រឆាំងនាវាចម្បាំង ៤០០ គ្រាប់ទៅឲ្យ តៃវ៉ាន់ ប្រើទប់ទល់នឹង ចិន

សហរដ្ឋអាមេរិកនឹងលក់មីស៊ីលប្រឆាំងនាវាចម្បាំងប្រភេទ Harpoon ចំនួន ៤០០ គ្រាប់ក្នុងតម្លៃ ១.១៧ ពាន់លានដុល្លារទៅឲ្យកោះតៃវ៉ាន់ ដើម្បីប្រើទប់ទល់នឹងការលុកលុយរបស់ប្រទេសចិន ។

យោងតាមប្រធានក្រុមប្រឹក្សាធុរកិច្ចអាមេរិក-តៃវ៉ាន់លោក Rupert Hammond-Chambers បានឲ្យដឹងថា កិច្ចព្រមព្រៀងនេះនឹងក្លាយជាការលក់ប្រព័ន្ធមីស៊ីលចល័តដំបូងបង្អស់របស់អាមេរិកទៅឲ្យរដ្ឋាភិបាលទីក្រុងតៃប៉ិ ។

ទោះជាយ៉ាងណា ក្រសួងការពារជាតិអាមេរិកត្រូវចំណាយពេលជិត ២ ឆ្នាំកន្លះឯណោះ ដើម្បីបញ្ចប់ការផលិត ក៏ដូចជាឈានដល់ការប្រគល់មីស៊ីលប្រឆាំងនាវាចម្បាំងប្រភេទ Harpoon ទៅឲ្យតៃវ៉ាន់ ខណៈដែលបរិមាណអាវុធសរុបរបស់តៃវ៉ាន់មានចំនួនជិត ១៩ ពាន់លានដុល្លារ ។

គួរបញ្ជាក់ថា ភាពតាងតឹងរវាងចិន និងតៃវ៉ាន់បានឡើងកម្ដៅកាន់តែខ្លាំង ចាប់តាំងពីដំណើរទស្សនកិច្ចទៅកាន់កោះតៃវ៉ាន់ដោយអតីតប្រធានសភាអាមេរិកលោកស្រី Nancy Pelosi កាលពីឆ្នាំមុន ដោយបង្ខំឲ្យចិនបង្កើនការធ្វើសមយុទ្ធយោធាទ្រង់ទ្រាយធំ ។

អ្វីដែលធ្វើឲ្យទីក្រុងប៉េកាំងកាន់តែខឹងសម្បារខ្លាំងទៀតនោះ គឺនៅពេលដែលមេដឹកនាំកោះនេះគឺលោកស្រី Tsai Ing-wen បានជួបជាមួយប្រធានសភាបច្ចុប្បន្នគឺលោក Kevin McCarthy នៅរដ្ឋកាលីហ្វ័រញ៉ាកាលពីដើមខែនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ លេចធ្លាយឯកសារ ៖ អាមេរិក បារម្ភខ្លាំងថា តៃវ៉ាន់ មិនអាចមានសមត្ថភាព ទប់ ចិន ឡើយ