ព្យុះ២ នឹងវាយប្រហារប្រទេសថៃ ចំថ្ងៃបោះឆ្នោត

មជ្ឈមណ្ឌលបម្រែបម្រួលអាកាសធាតុនិងគ្រោះមហន្តរាយនៃសាកលវិទ្យាល័យ Rangsit បានព្យាករថា​ ព្យុះចំនួនពីរនឹងវាយប្រហារប្រទេសថៃនៅសប្តាហ៍ក្រោយ ពោលគឺអាចបង្កផលប៉ះពាល់ចំថ្ងៃបោះឆ្នោត ថ្ងៃទី១៤ឧសភា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយកមជ្ឈមណ្ឌលលោក Seri Suparatit បាននិយាយថា ព្យុះចំនួនពីរ ដែលមួយមានប្រភពចេញពីមហាសមុទ្រឥណ្ឌានិងមួយទៀតនៅសមុទ្រចិនខាងត្បូង កំពុងធ្វើដំណើរសំដៅមកប្រទេសថៃ។

លោក Suparatit បានគូសបញ្ជាក់ថា ព្យុះស៊ីក្លូន Mocha និងព្យុះមួយទៀត នឹងជះឥទ្ធិពលលើប្រទេសថៃចាប់ពីថ្ងៃទី៩ខែឧសភា។ យ៉ាងណាក៏ដោយ កម្តៅនិងសម្ពាធទាប ត្រូវបានគេរំពឹងថា នឹងបណ្តាលឲ្យមានផ្គររន្ទះចាប់ពីថ្ងៃទី៨ឧសភា នៅតំបន់កណ្តាល ខាងកើត ឦសាន និងខាងជើង។ លោក Suparatit ក៏លើកឡើងពីលទ្ធភាពនៃព្យុះផ្គររន្ទះចំថ្ងៃបោះឆ្នោតផងដែរ ជាពិសេសនៅតំបន់ភាគខាងត្បូងប្រទេសថៃ។

ខណៈថ្ងៃបោះឆ្នោតកាន់តែខិតជិតមកដល់នោះ លោកបានផ្តល់អនុសាសន៍ថា គណៈកម្មាធិការរៀបចំការបោះឆ្នោត (EC) គួរតែរៀបចំទីតាំងក្នុងកន្លែងបិទជិតសម្រាប់ការិយាល័យបោះឆ្នោត ដើម្បីចៀសវាងការរំខានណាមួយ ដោយសារព្យុះ។

លើសពីនេះ លោក​ក៏​បាន​ព្រមាន​ដែរ​ថា ភ្លៀង​ធ្លាក់​ខ្លាំង​នៅ​ថ្ងៃ​បោះឆ្នោត ​អាច​បង្ក​បញ្ហាធ្ងន់ធ្ងរ ដល់ការធ្វើ​ចរាចរណ៍។

គួរបញ្ជាក់ថា រដូវវស្សានៅប្រទេសថៃ ជាធម្មតាចូលមកដល់ចាប់ពីខែឧសភាដល់ខែតុលា ហើយកម្រិតទឹកភ្លៀងខ្ពស់បំផុតជាធម្មតាគឺស្ថិតនៅក្នុងខែកញ្ញា និងខែតុលា៕

ប្រែសម្រួល៖ Vann Vann

ប្រភព៖ Thaiger

ចុចអាន៖ ៥៩ខេត្តនៅ ថៃ ត្រូវវាយប្រហារដោយព្យុះរដូវក្តៅ