ព័ត៌មានអន្ដរជាតិ

លោក ប្រាយុទ្ធ និយាយថា លោកនឹងទទួលស្គាល់លទ្ធផលបោះឆ្នោត

បានផុស

៣ years មុន

នៅ

ថ្ងៃចន្ទ ១៥ ឧសភា ២០២៣

ដោយ

នាយករដ្ឋមន្រ្តីចាំផ្ទះរបស់ថៃលោកឧត្តមសេនីយ៍ ប្រាយុទ្ធ ចាន់អូចា បាននិយាយថា លោកនឹងគោរព ក៏ដូចជាទទួលស្គាល់លទ្ធផលបោះឆ្នោត ស្របពេលគណបក្សចលនាឆ្ពោះទៅមុខ ដែលជាបក្សប្រឆាំង កំពុងនាំមុខសំឡេងភាគច្រើនក្នុងការរាប់សន្លឹកឆ្នោតបឋមនាពេលនេះ ។

ថ្លែងយ៉ាងខ្លីទៅកាន់អ្នកសារព័ត៌មាន ខណៈដែលលោកកំពុងចាកចេញពីទីស្នាក់ការកណ្តាលរបស់គណបក្សថៃរួបរួមជាតិ, លោក ប្រាយុទ្ធ បានថ្លែងអំណរគុណដល់ប្រជាពលរដ្ឋដែលបានបោះឆ្នោតគាំទ្រគណបក្សលោក ។

លោក ប្រាយុទ្ធ បានលើកឡើងថា “ខ្ញុំនឹងបន្តបំពេញកាតព្វកិច្ចរបស់ខ្ញុំឲ្យអស់ពីសមត្ថភាព ហើយខ្ញុំនឹងបន្តបម្រើជាតិ សាសនា និងព្រះមហាក្សត្រអស់មួយជីវិត“ ។

ទន្ទឹមនោះ នាយករដ្ឋមន្ត្រីដែលផុតអាណត្តិរូបនេះបានថ្លែងទៀតថា “លោកសូមជូនពរប្រទេសឲ្យមានសន្តិភាព និងសណ្តាប់ធ្នាប់ ហើយលោកក៏មានការគោរពចំពោះដំណើរការប្រជាធិបតេយ្យ និងលទ្ធផលនៃការបោះឆ្នោតនេះផងដែរ“ ជាពិសេសលោកសង្ឃឹមថា “ក្រោយការបោះឆ្នោតនេះហើយ ប្រទេសថៃនឹងមានសុខសន្តិភាព និងការអភិវឌ្ឍ“ ។

គួរបញ្ជាក់ថា បើតាមលទ្ធផលបោះឆ្នោតបឋម គណបក្សចលនាឆ្ពោះទៅមុខទទួលបានអាសនៈនៅឯរដ្ឋសភាចំនួន ១៥១ អាសនៈ, បក្សភឿថៃបាន ១៤១ អាសនៈ ហើយគណបក្ស Palang Pracharath បាន ៤១ អាសនៈ ខណៈគណបក្សថៃរួបរួមជាតិរបស់លោក ប្រាយុទ្ធ បានត្រឹមតែ ៣៦ អាសនៈប៉ុណ្ណោះ ៕

ប្រែសម្រួលដោយ ៖ ជីវ័ន្ត

ប្រភព ៖ Thai PBS

ចុចអាន ៖ មកស្គាល់បេក្ខជននាយករដ្ឋមន្ត្រីថ្មីរបស់ ថៃ ដែលកំពុងនាំមុខក្នុងការរាប់សន្លឹកឆ្នោត