ទីក្រុងកៀវ រងការវាយប្រហារធ្ងន់ធ្ងរ ដោយយន្តហោះដ្រូន និងមីស៊ីលរបស់ រុស្ស៊ី

រដ្ឋធានី កៀវ នៃប្រទេសអ៊ុយក្រែន ត្រូវរងគ្រោះយ៉ាងធ្ងន់ធ្ងរដោយការវាយប្រហារតាមផ្លូវអាកាសរបស់រុស្ស៊ី ដែលនេះជាការវាយប្រហារអាកាសលើកទី៨របស់រុស្ស៊ី លើទីក្រុងកៀវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងវីដេអូលើប្រព័ន្ធផ្សព្វផ្សាយសង្គម, ប្រព័ន្ធការពារដែនអាកាស អាចត្រូវបានគេមើលឃើញ បាញ់ទម្លាក់មីស៊ីលលើទីក្រុង។

ស្របពេលជាមួយគ្នានោះ រដ្ឋាភិបាលបានចេញសារព្រមានប្រជាជន ឲ្យនៅឆ្ងាយពីបង្អួច ខណៈកម្ទេចកម្ទីពីមីស៊ីលដែលស្ទាក់ចាប់បាន បានធ្លាក់ស្រោចពីលើមេឃ។

អភិបាលក្រុងលោក Vitali Klitschko និយាយថា កម្ទេចកម្ទីមីស៊ីលមួយចំនួន បានធ្លាក់នៅកណ្តាលរដ្ឋធានី រួមទាំងលើសួនសត្វរបស់ទីក្រុងផងដែរ។

មន្ត្រីម្នាក់អះអាងថា នេះជាការវាយប្រហារដោយប្រើទាំងយន្តហោះគ្មានមនុស្សបើក និងមីស៊ីល ក្នុងទ្រង់ទ្រាយធំ និងមានកម្លាំងខ្លាំងក្លាបំផុត។

គួរបញ្ជាក់ថា កាលពីប៉ុន្មានថ្ងៃមុននេះ លោកប្រធានាធិបតី Volodymyr Zelensky បានធ្វើដំណើរទៅកាន់ទ្វីបអឺរ៉ុប ដោយក្នុងនោះ សម្ព័ន្ធមិត្តលោកខាងលិច រួមទាំងនាយករដ្ឋមន្ត្រីអង់គ្លេស Rishi Sunak និងប្រធានាធិបតីបារាំង Emmanuel Macron ផងដែរ បានសន្យាដល់លោកថា នឹងផ្តល់ជំនួយយោធាក្នុងទំហំទឹកប្រាក់រាប់ពាន់លានដុល្លារ។

ចាប់តាំងពីរុស្ស៊ីវាយលុកអ៊ុយក្រែននៅថ្ងៃទី២៤ខែកុម្ភៈឆ្នាំមុនមក ជនស៊ីវិល និងយុទ្ធជនរាប់ពាន់នាក់ត្រូវបានសម្លាប់ ឬរងរបួស ហើយទីក្រុង និងទីប្រជុំជននានាត្រូវបានបំផ្លាញ។ លើសពីនេះ ប្រជាជនអ៊ុយក្រែនជិត៨.២លាននាក់ បានចុះឈ្មោះជាជនភៀសខ្លួននៅអឺរ៉ុប៕

ប្រែសម្រួល៖ Vann Vann

ប្រភព៖ BBC

ចុចអាន៖ អតីតមេទ័ពអង់គ្លេស ព្រមានថា អ៊ុយក្រែន ត្រូវតែឈ្នះរុស្ស៊ីឲ្យបាននៅឆ្នាំនេះ បើមិនដូច្នោះទេ លោកខាងលិចនឹងលែងគាំទ្រ