ឆ្មាំរាជវាំងអង់គ្លេសច្រើននាក់ ដួលសន្លប់ ពេលហាត់សមក្រោមកម្តៅថ្ងៃ ដ៏ក្តៅគគុក

ថ្វីបើរដូវក្តៅមិនទាន់ចូលដល់ស៊ប់ក៏ដោយ ប៉ុន្តែអ្នកឧតុនិយមបានព្យាករថា ចក្រភពអង់គ្លេសមានឱកាស៤៥% ក្នុងការជួបប្រទះរលកកម្តៅម្តងទៀតដូចកាលឆ្នាំ២០២២ ដែលបណ្តាលឲ្យមានភ្លើងឆេះព្រៃ បិទសាលារៀន និងសីតុណ្ហភាពកើនលើស៤០អង្សាសេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហើយកាលពីថ្ងៃសៅរ៍ទី១០ខែមិថុនា ឆ្មាំរាជវាំងចំនួន៣នាក់ បានដួលសន្លប់ នៅពេលពួកគេហាត់សមសម្រាប់ក្បួនព្យុហយាត្រាព្រះរាជពិធីបុណ្យចម្រើនព្រះជន្ម ស្តេច Charles ក្រោមកម្តៅថ្ងៃដ៏ក្តៅគគុកក្នុងទីក្រុងឡុងដ៍។

ក្នុងវីដេអូ​ ដែលគេចែកចាយ​ បាន​បង្ហាញឲ្យឃើញ​​ឆ្មាំ​​ដួល​សន្លប់និង​ត្រូវ​បាន​គេដាក់លើហ្វ្រង់ការសែងចេញ ខណៈអ្នកខ្លះ ដើរចេញដោយខ្លួនឯង។

ប្រព័ន្ធផ្សព្វផ្សាយក្នុងស្រុកបានរាយការណ៍ថា សីតុណ្ហភាពក្នុងទីក្រុងឡុងដ៍ មានកម្រិតខ្ពស់ដល់ទៅ៣១អង្សាសេ ហើយក្រុមអ្នកព្យាករព្រមានថា ប្រទេសអង់គ្លេស អាចជួបប្រទះសីតុណ្ហភាពក្តៅខ្លាំង ស្រដៀងទៅនឹងរលកកម្តៅដែលបានកត់ត្រាក្នុងឆ្នាំ២០២២ដែរ។

សមាជិកម្នាក់នៃក្រុមឆ្មាំវែលស៍ បានប្រាប់ប្រព័ន្ធផ្សព្វផ្សាយចក្រភពអង់គ្លេសថា “ការរៀបចំក្បួនហាត់សមនោះ គឺពិតជាពិបាកជាងអ្វីដែលអ្នកឃើញក្នុងទូរទស្សន៍ទៅទៀត។ វាហាក់ដូចជាកំពុងឈរនៅក្នុងបន្ទប់សូណា ហើយមានកាន់ដុំដែកទម្ងន់២០០គីឡូក្រាម នៅដៃឆ្វេងរបស់អ្នកអ៊ីចឹង”។

គួរបញ្ជាក់ថា ឧប្បត្តិហេតុកាលពីថ្ងៃសៅរ៍ មិនមែនជាលើកទីមួយទេ ដែលឆ្មាំត្រូវបានគេឃើញដួលនៅតាមទីសាធារណៈ។ កាលពីខែកញ្ញា ឆ្នាំ២០២២ ឆ្មាំរាជវាំងម្នាក់ បានដួលជិតមញ្ជូសារបស់ម្ចាស់ក្សត្រី Elizabeth អំឡុងព្រះរាជពិធីបុណ្យសពរបស់ទ្រង់៕

ប្រែសម្រួល៖ Vann Vann

ប្រភព៖ Sputnik

ចុចអាន៖ ស្តេច Charles ទី៣ ក្លាយជាព្រះមហាក្សត្រថ្មីរបស់ ចក្រភពអង់គ្លេស ជាផ្លូវការ នៅក្នុងពិធីជាប្រវត្តិសាស្ត្រ