លោក Biden ពន្យារពេលកិច្ចប្រជុំជាមួយប្រមុខអង្គការ ណាតូ ព្រោះតែឈឺធ្មេញ

សេតវិមានបាននិយាយថា ប្រធានាធិបតីសហរដ្ឋអាមេរិកលោក Joe Biden បានពន្យារពេលកិច្ចប្រជុំជាមួយប្រមុខអង្គការណាតូ និងថែមទាំងលុបចោលព្រឹត្តិការណ៍សាធារណៈផ្សេងទៀតរបស់លោកកាលពីថ្ងៃចន្ទ ដើម្បីធ្វើការព្យាបាលសរសៃធ្មេញរបស់លោក ។

ពាក់ព័ន្ធនឹងបញ្ហានេះដែរ លោកវេជ្ជបណ្ឌិត Kevin O’Connor បាននិយាយថា លោក Biden មានអាការៈឈឺធ្មេញខ្លាំងកាលពីថ្ងៃអាទិត្យ ហើយបន្ទាប់ពីឆ្លងកាត់ការថតកាំរស្មីអ៊ិចបានបង្ហាញថា លោក Biden នឹងត្រូវការដកធ្មេញដែលឈឺចុកចាប់មួយនេះ ។

សេតវិមានបាននិយាយនៅក្នុងសេចក្តីថ្លែងការណ៍មួយទៅកាន់អ្នកសារព័ត៌មានថា លោក Biden ដែលបច្ចុប្បន្នមានវ័យ ៨០ ឆ្នាំកាន់តែឈឺធ្មេញខ្លាំងទៅៗនៅថ្ងៃចន្ទ និងទទួលការចាក់ថ្នាំស្ពឹកផងដែរ ប៉ុន្តែទោះជាយ៉ាងណា លោកមិនបានផ្ទេរការងារណាមួយទៅឲ្យលោកស្រីអនុប្រធានាធិបតី Kamala Harris នៅក្រោមវិសោធនកម្មទី ២៥ នៃរដ្ឋធម្មនុញ្ញរបស់សហរដ្ឋអាមេរិកនោះទេ ។

គួរបញ្ជាក់ថា កិច្ចប្រជុំទ្វេភាគីរបស់លោកប្រធានាធិបតី Joe Biden ជាមួយលោក Jens Stoltenberg អគ្គលេខាធិការអង្គការណាតូ ដែលតាមកាលវិភាគកំណត់គឺធ្វើឡើងកាលពីថ្ងៃចន្ទ ប៉ុន្តែត្រូវបានលើកពេលមកថ្ងៃអង្គារនេះវិញ បន្ទាប់ពីទទួលការព្យាបាលរួចរាល់ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ អារ៉ាប៊ីសាអូឌីត គំរាម អាមេរិក នឹងជួបវិបត្តិសេដ្ឋកិច្ចធ្លាក់ចុះ បើនៅបន្ត ឈ្លោះរឿងកាត់បន្ថយប្រេង