ព័ត៌មានអន្ដរជាតិ

កូរ៉េខាងជើង ព្រមានឆ្លើយតបលើសលប់ បន្ទាប់ពីលោក Blinken ជួបប្រធានាធិបតី Xi Jinping

បានផុស

៣ years មុន

នៅ

ថ្ងៃអាទិត្យ ២៥ មិថុនា ២០២៣

ដោយ

កូរ៉េខាងជើង បានប្រតិកម្មយ៉ាងខ្លាំងចំពោះការលើកឡើងរបស់អ្នកការទូតកំពូលរបស់អាមេរិកអំពីតួនាទីរបស់ចិន ទាក់ទងនឹងស្ថានភាពនៅឧបទ្វីបកូរ៉េ ដោយព្រមានអំពីការឆ្លើយតបដ៏លើសលប់ចំពោះគោលនយោបាយរបស់សហរដ្ឋអាមេរិកប្រឆាំងនឹងទីក្រុងព្យុងយ៉ាង។

បន្ទាប់ពីរដ្ឋមន្ត្រីការបរទេសអាមេរិក លោក Antony Blinken ជួបជាមួយប្រធានាធិបតីចិន Xi Jinping កាលពីថ្ងៃច័ន្ទ កូរ៉េខាងជើងបានធ្វើសន្និសីទសារព័ត៌មានមួយដែលពណ៌នាប្រទេសចិនថា កំពុងស្ថិតក្នុងជំហរពិសេសមួយដើម្បីដាក់សម្ពាធលើកូរ៉េខាងជើងឲ្យចូលរួមក្នុងកិច្ចសន្ទនាមួយក្នុងគោលបំណងបញ្ឈប់សកម្មភាពគ្រោះថ្នាក់របស់ទីក្រុងព្យុងយ៉ាង។

អគ្គនាយកម្នាក់នៅក្រសួងការបរទេសកូរ៉េខាងជើង ចោទប្រកាន់សហរដ្ឋអាមេរិកថា បានបង្កឲ្យមានភាពតានតឹងកាន់តែខ្លាំងឡើងនៅលើឧបទ្វីបកូរ៉េសម្រាប់ការរក្សានូវគោលនយោបាយអរិភាពចំពោះទីក្រុងព្យុងយ៉ាង។ អគ្គនាយកព្រមានទៀតថា មាត្រដ្ឋាន និងវិសាលភាពនៃវិធានការតបតរបស់កូរ៉េខាងជើងនឹងត្រូវបានពង្រីកបន្ថែមទៀត ឬលើសលប់និងវាយលុក នៅពេលដែលអាមេរិកបង្កើនការបង្កហេតុខាងយោធារបស់ខ្លួននៅឧបទ្វីបនិងតំបន់។

ការព្រមាននេះទំនងជាធ្វើឡើងក្នុងការឆ្លើយតបទៅនឹងកិច្ចសហប្រតិបត្តិការរវាងអាមេរិក និងកូរ៉េខាងត្បូង រួមទាំងសមយុទ្ធយោធារួមផងដែរ។

សេចក្តីថ្លែងការណ៍នេះក៏ឆ្លុះបញ្ចាំងពីការកើនឡើងនៃការរិះគន់របស់កូរ៉េខាងជើង ទៅលើសហរដ្ឋអាមេរិក ខណៈដែលថ្ងៃអាទិត្យនេះគឺជាខួបលើកទី ៧៣ ចាប់តាំងពីការចាប់ផ្តើមនៃសង្គ្រាមកូរ៉េ ដែលទីក្រុងព្យុងយ៉ាងចាត់ទុកថាជាថ្ងៃនៃការតស៊ូប្រឆាំងនឹងសហរដ្ឋអាមេរិក៕

ប្រែសម្រួល៖ សាង ស្រីល័ក្ខ

ប្រភព៖NHK

ចុចអាន៖លោក Trump ថា អ្នកដែលចាក់ឫសក្នុងរដ្ឋប្រហាររុស្ស៊ី ប្រយ័ត្នជួបផលវិបាកវិញ