ព័ត៌មានអន្ដរជាតិ

ក្រុមអ្នកតវ៉ាទាមទារឲ្យសមាជិកព្រឹទ្ធសភាលាលែងតំណែង ហើយឲ្យគណបក្សភឿថៃរក្សានូវសុចរិតភាព

បានផុស

៣ years មុន

នៅ

ថ្ងៃសៅរ៍ ២៩ កក្កដា ២០២៣

ដោយ

ក្រុមបាតុករគាំទ្រលទ្ធិប្រជាធិបតេយ្យបានប្រមូលផ្តុំគ្នានៅផ្លូវ Ratchaprasong ក្នុងទីក្រុងបាងកកកាលពីថ្ងៃព្រហស្បតិ៍ដោយទាមទារឲ្យសមាជិកព្រឹទ្ធសភាលាលែងពីតំណែង ហើយថាក្រុមចម្រុះទាំង៨ភាគីនៅតែរក្សាជំហររបស់ខ្លួនក្នុងការបង្កើតរដ្ឋាភិបាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមបាតុករជាច្រើនក្រុម រួមមាន រណសិរ្សរួបរួមធម្មសភា, បាតុកម្ម Mokeluang Rimnam, ThaluWang និងចលនាប្រជាជនដើម្បីសង្គមមួយ (P-Move) បានចាប់ផ្តើមធ្វើបាតុកម្មនៅម៉ោង៥ល្ងាច ខណៈអ្នកតវ៉ាខ្លះបានលើកបដាសរសេរអក្សធំៗនៅលើស្ពានអ្នកថ្មើរជើង។ ពួកគេក៏បានរៀបចំមួយផ្នែកទៀតជាការរំលឹកដល់បាតុករដែលបានស្លាប់ក្នុងអំឡុងបាតុកម្មប្រឆាំងនឹងរដ្ឋាភិបាលដែលដឹកនាំដោយអតីតនាយករដ្ឋមន្ត្រី Abhisit Vejjajiva កាលពីឆ្នាំ ២០១០ផងដែរ។

ក្រុមអ្នកតវ៉ាបានជំរុញសមាជិកព្រឹទ្ធសភាឲ្យស្តាប់សំឡេងប្រជាជន និងគណបក្សភឿថៃរក្សាជំហររបស់ខ្លួនក្នុងការបង្កើតរដ្ឋាភិបាលប្រជាធិបតេយ្យជាមួយគណបក្សចលនាឆ្ពោះទៅមុខ។ ពួកគេក៏បានជំរុញឲ្យគណបក្សនយោបាយ និងសមាជិកព្រឹទ្ធសភាបញ្ឈប់ការគិតថា ការធ្វើវិសោធនកម្មច្បាប់ប្រមាថព្រះមហាក្សត្រមានគោលបំណងផ្តួលរំលំរបបរាជានិយម ដោយនិយាយថា វាមានគោលបំណងស្វែងរកដំណោះស្រាយត្រឹមត្រូវ និងយុត្តិធម៌សម្រាប់ប្រទេស។

សកម្មជននយោបាយ Thatchapong Kaedam បាននិយាយថា ប្រសិនបើបក្សភឿថៃក្បត់សម្ព័ន្ធ នោះវានឹងប្រឈមមុខនឹងការផ្តន្ទាទោសពីប្រជាជន ដោយបន្ថែមថា គណបក្សគួរតែប្រកាន់ខ្ជាប់យ៉ាងម៉ឺងម៉ាត់នូវគោលជំហររបស់ខ្លួន ដើម្បីគេចចេញពីគម្រោងរបស់គណបក្សអភិរក្សនិយម។

លោកបានបន្ថែមថា អតីតនាយករដ្ឋមន្ត្រីថាក់ស៊ីន ស៊ីណាវ៉ាត្រា និងសកម្មជនដែលបានភៀសខ្លួនចេញពីប្រទេសថៃដើម្បីគេចពីការចោទប្រកាន់នយោបាយមានសិទ្ធិត្រឡប់ទៅមាតុប្រទេសវិញ ដោយបន្ថែមថា គ្រប់ភាគីគួរតែគោរពការបោះឆ្នោតរបស់ប្រជាពលរដ្ឋក្នុងគោលបំណងទប់ស្កាត់ការប៉ះទង្គិចគ្នាម្តងទៀតរវាងបាតុករ និងប៉ូលិសកុបកម្មនៅ Din Daeng ប្រសព្វគ្នាកាលពីឆ្នាំមុន។

ដោយឡែក លោក Somyot Pruksakamsuk មេដឹកនាំក្រុមអ្នកប្រជាធិបតេយ្យ ២៤ មិថុនា បាននិយាយថា សមាជិកព្រឹទ្ធសភា និងតុលាការធម្មនុញ្ញគួរតែត្រូវបានស្តីបន្ទោសចំពោះការពន្យារពេលក្នុងការបង្កើតរដ្ឋាភិបាល។

លោកបានអះអាងទៀតថា ការពន្យារពេលនេះអាចបណ្តាលឲ្យខូចខាតដល់សេដ្ឋកិច្ចជាង ១០០ ពាន់លានបាត ដោយបន្ថែមថាបំណុលគ្រួសារអាចកើនឡើងដល់ ៩០% នៃផលិតផលក្នុងស្រុកសរុប (GDP) របស់ប្រទេសថៃ។ លោកបានបន្តថា ប្រសិនបើប្រជាជនមានប្រាក់ ១០០ បាត ពួកគេត្រូវចំណាយប្រាក់ ៩០ បាតដើម្បីសងបំណុល។

ទោះយ៉ាងណាក៏ដោយ ក្រុមបាតុករបានប្តេជ្ញាថានឹងធ្វើការប្រមូលផ្តុំពីប្រសព្វនៃតំបន់ Asok Montri ដល់Ratchaprasong នៅថ្ងៃសៅរ៍វេលាម៉ោង៥ល្ងាចនេះ៕