ម៉ាលី និងបួគីណាហ្វាសូ ព្រមានផ្ទុះសង្គ្រាម បើប្រទេសណាហ៊ានធ្វើ​អន្តរាគមន៍យោធាប្រឆាំងរដ្ឋប្រហារនៅ នីហ្សេ

រដ្ឋាភិបាលយោធានៃប្រទេសបួគីណាហ្វាសូ និងម៉ាលី បានព្រមានថា ប្រសិនបើប្រទេសណាហ៊ានធ្វើអន្តរាគមន៍យោធាប្រឆាំងនឹងមេដឹកនាំរដ្ឋប្រហារកាលពីសប្តាហ៍មុនក្នុងប្រទេសនីហ្សេ នឹងត្រូវបានចាត់ទុកថាជា “ការប្រកាសសង្រ្គាម” ប្រឆាំងនឹងប្រទេសរបស់ពួកគេ ។

ប្រទេសនៅក្បែរខាងរបស់នីហ្សេទាំងពីរបានចេញការព្រមាននៅក្នុងសេចក្តីថ្លែងការណ៍រួមនៅលើកញ្ចក់ទូរទស្សន៍ជាតិ ពោលប៉ុន្មានថ្ងៃ បន្ទាប់ពីមេដឹកនាំអាហ្វ្រិកខាងលិច បានធ្វើរដ្ឋប្រហារដើម្បីទម្លាក់លោកប្រធានាធិបតីន Mohamed Bazoum ។

ទន្ទឹមនោះ ប្រទេសទាំងពីរក៏បានព្រមានផងដែរថា “ការធ្វើអន្តរាគមន៍យោធាណាមួយប្រឆាំងនឹងប្រទេសនីហ្សេ គឺស្មើនឹងការប្រកាសសង្រ្គាមប្រឆាំងនឹងប្រទេសបួគីណាហ្វាសូ និងម៉ាលី ជាពិសេសទង្វើបែបនេះអាចបណ្តាលឲ្យមានផលវិបាកមហន្តរាយ និងអាចធ្វើឲ្យតំបន់ទាំងមូលអស្ថិរភាពផងដែរ” ។

ស្របពេលជាមួយគ្នានេះ អាជ្ញាធរ​យោធាបួគីណាហ្វាសូ និង​ប្រទេស​ម៉ាលី​បានបញ្ជាក់ទៀត​ថា “ពួកគេបដិសេធ​មិន​អនុវត្តទណ្ឌកម្ម​ខុស​ច្បាប់ ឬមិន​ស្រប​ច្បាប់ ក៏ដូចជា​អំពើអមនុស្សធម៌​ប្រឆាំង​នឹង​ប្រជាជន ឬ​អាជ្ញាធរ​នីហ្សេឡើយ” ។

គួរបញ្ជាក់ថា រដ្ឋប្រហារនៅប្រទេសនីហ្សេកាលពីថ្ងៃទី២៦ ខែកក្កដា បង្កឲ្យមានការភ្ញាក់ផ្អើលពាសពេញទ្វីបអាហ្រ្វិកខាងលិច ដោយធ្វើឲ្យសម្ព័ន្ធមិត្តលោកខាងលិច ក៏ដូចជាស្ថាប័នក្នុងតំបន់របស់ប្រទេសនេះ ចេញមកប្រឆាំងនឹងរដ្ឋប្រហារយោធា ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ កងទ័ព នីហ្សេ ប្រកាសធ្វើរដ្ឋប្រហារ តាមកញ្ចក់ទូរទស្សន៍ជាតិ